कर्जत: आमदार रोहित पवार यांनी आज गुरुवारी कर्जतमध्ये आयोजित केलेल्या आमसभेत सर्वच शासकीय विभागांविरोधात तक्रारींचा पाऊस पडला. संतप्त आमदार पवार यांनी अधिकाऱ्यांना धारेवर धरत, कधी समजून सांगत तर कधी कारवाईचा धाक दाखवत नागरिकांच्या अडचणी सोडवल्या. प्रश्न उपस्थित करणारा कार्यकर्ता जर वेगळ्या पद्धतीने बोलत असेल तर त्यालाही खडेबोल सुनावले.
अधिकाऱ्यांनी माझ्या पक्षाचा कार्यकर्ता असेल आणि तो चुकीचे काम करीत असल्यास त्याच्यावर देखील कारवाई करा, असे सांगत त्यांनी अन्याय होऊ देणार नाही, असेही स्पष्ट केले. तालुक्यातील विकासकामांना गती देण्यासाठी व नागरिकांच्या समस्या सोडवण्यासाठी रोहित पवार यांच्या अध्यक्षतेखाली आमसभा आयोजित करण्यात आली होती. विविध शासकीय विभागांचा आढावा घेण्यात आला. अधिकारी, कर्मचारी तसेच नागरिक मोठ्या संख्येने उपस्थित होते.
नागरिकांच्या तक्रारींवर आमदार पवार यांनी संबंधित अधिकाऱ्यांशी संवाद साधत प्रश्न मार्गी लावण्याचे आदेश दिले. यामध्ये अतिवृष्टीमुळे नुकसान झालेल्या शेतकऱ्यांना पंचनामे करून तत्काळ भरपाई देणे, पंचनाम्यातून कोणताही शेतकरी वगळू नये. कुकडी व सीना प्रकल्पाच्या काठावरील जमिनींची समस्या, शेतीसंबंधित कागदपत्रांच्या प्रक्रियेतील अडचणी, घरकुल योजना, रेशनकार्ड, पोलीस, भूमी अभिलख विरुद्धच्या तक्रारी, घरकुल, रस्ते, वैयक्तिक लाभाच्या योजनांतील अडवणूक, त्यासाठी होणारी पैशांची मागणी आदी तक्रारी नागरिकांनी केल्या. वर्षभरात पूर्ण झालेल्या व सुरू असलेल्या विकासकामांचा आढावा घेण्यात आला, आगामी वर्षातील कामाचा आराखडा तयार करण्यात आला.
भरपाईसाठी सरकारच्या मानगुटीवर बसू
आमसभेत सर्वाधिक चर्चा अतिवृष्टीमुळे शेतकऱ्यांचे झालेले नुकसान, त्याची भरपाई या विषयावर झाली. नुकसानीचे पंचनामे तातडीने करा. यावेळी बोलताना आमदार पवार म्हणाले, नैसर्गिक आपत्तीमध्ये सापडलेल्या शेतकऱ्यांना वाऱ्यावर सोडणार नाही. सरकारच्या मानगुटीवर बसून नुकसान भरपाई मिळवून देऊ.
भर पावसात ७ तास आमसभा
आमसभेला मोठा प्रतिसाद मिळाला. तालुक्यातील गावागावांमधून शेतकरी मोठ्या संख्येने उपस्थित होते. सकाळी ११.३० वा. सुरू झालेली सभा तब्बल ७ तास चालली. तोपर्यंत शेतकरी थांबून होते. शेतकऱ्यांचे अतिवृष्टीचे नुकसान, रस्ते, वीज, आरोग्य सुविधांचे प्रश्न उपस्थित करण्यात आले, त्याचे निराकरणही करण्यात आले.
