Maharashtra Breaking News Updates : “विधानसभेत रंगला रम्मीचा डाव, कृषिमंत्री चले जाव!”, कोकाटेंच्या राजीनाम्यासाठी शरद पवारांच्या राष्ट्रवादीची निदर्शने

मुख्यमंत्री देवेंद्र फडणवीस यांच्या वाढदिवसानिमित्त विटा मध्ये भाजप कडून कार्यकर्ता संवाद मेळाव्याचे आयोजन करण्यात आले होते.या मेळाव्याला मंत्री जयकुमार गोरे, आमदार सदाभाऊ खोत, आमदार गोपीचंद पडळकर यांची उपस्थिती होती.

गोपीचंद पडळकर आणि मी जिवा भावाचे मित्र आहोत. आणि माझ्या खात्यामध्ये गोपीचंद पडळकर यांच्यासाठी बजेटचा विषय नाही. देवेंद्र फडणवीस माझ्या खात्याला जो बजेटचा कोटा देतील, तो सगळा कोटा गोपीचंद पडळकर यांच्यासाठी द्यायची माझी तयारी आहे, असे ग्रामविकास मंत्री जयकुमार गोरे म्हणाले आहेत . गोपीचंद पडळकर हा सर्वसामान्य व्यक्तीसाठी काम करणारा, व्यथा मांडणारा आणि तो प्रश्न तडीस नेणारा हा बहुजनांचा नेता आहे. एखाद्या प्रश्नासाठी गोपीचंद पडळकर यांच्यावर मुद्द्याने आणि वेळ आली तर गुद्याने देखील लढायची तयारी असते. त्यामुळे असे नेतृत्व आपण वाढवले पाहिजे असे मंत्री जयकुमार गोरे म्हणाले.

पृथ्वीच्या अंतापर्यत आमच्या माण खटाव भागात पाणी येणार नाही, असे बारामतीची मंडळी सांगत होते. त्यामुळे आमच्या भागातील माणसे देखील पाणी मागत नव्हते. पण देवेंद्र फडणवीस यांच्यामुळे आमच्या भागात पाणी आले. आज आमच्या तालुक्यात 5 कारखाने उभे आहेत. त्यामुळे ज्या भागात पृथ्वीच्या अंतापर्यत पाणी न येणाऱ्या भागात या निवडणुकीत मी उभे राहिलो आणि दुष्काळ मुक्तीसाठी मी उभा राहिलो आहे, असे जनतेला सांगितले.

मुंबई पूर्व उपनगरात पावसाला सुरुवात झाली असून घाटकोपर, विकोळी, काजूर, भांडुप, मुलुंड परिसरात पावसाने हजेरी लावली आहे.

डोंबिवली एमआयडीसीमधील दोन कंपन्यांना मोठी आग लागल्याची घटना घडली आहे. मिळालेल्या माहितीनुसार, एरोसेल कंपनी आणि विश्वनाथ गारमेंट कंपनीला ही आग लागली असून घटनास्थळावर मोठ्या प्रमाणात धुराचे लोट उसळताना पाहायला मिळत आहेत. दरम्यान अग्निशमन दल आणि पोलीस पथक घटनास्थळी दाखल झाले असून आगीवर नियंत्रण मिळवण्यासाठी प्रयत्न केले जात आहेत.

मुख्यमंत्री देवेंद्र फडणवीस यांच्या ड्रीम प्रोजेक्ट असणाऱ्या पंढरपूर कॉरिडॉरला स्थानिकांचाविरोध आहे. हाच विरोध दर्शवण्यासाठी संतांच्या अभंगातील ओव्यांचा वापर करून पंढरपुरात पोस्टरबाजी करण्यात आली. आज मुख्यमंत्री देवेंद्र फडणवीस पंढरपुरात आहेत. या पार्श्वभूमीवर "वतन आमची मिराशी पंढरी..." हा संत नामदेव महाराजांचा अभंग पोस्टरवर छापून देवेंद्रजी आपण पंढरपूरची मूळ रचना व संस्कृती कायम ठेवाल असा विश्वास वाटतो, अशा आशयाचे पोस्टर लावण्यात आले आहेत. पंढरपूर तीर्थक्षेत्र बचाव समितीने हे पोस्टर लावले आहेत. फडणवीसांचा ड्रीम प्रोजेक्ट असणाऱ्या पंढरपूर कॉरिडॉरमध्ये मंदिर परिसरातील 600 घरांचे भूसंपादन प्रस्तावित आहे. याच भूसंपादनाला आता थेट विरोध करण्यासाठी संत वचनांचा वापर करून फडणवीस यांचे स्वागत अनोख्या पोस्टर मधून केले जाते.

"राज्याचे मुख्यमंत्री आणि गृहमंत्री ज्या नागपूरचे आहेत, तिथेच मुली सुरक्षित नाही. काल नागपूरमध्ये मुलींच्या वसतिगृहात शिरून आरोपींनी विनयभंग केला. या वसतिगृहात पुरेशी सुरक्षा नाही, सीसीटिव्ही नाही, कोणाच्या भरवश्यावर मुली इथे राहतील? या मुलींचे मोबाईल चोरले गेले. नागपूरात गुन्हेगारांना पोलिसांचा धाक उरला नाही का ? वसतिगृहातील मुली प्रचंड घाबरल्या असून त्यांना सुरक्षेची हमी कोण देणार? या वसतिगृहात ६४ मुली राहतात, या वसतीगृहाच्या जवळच दारूचे दुकान असल्याने या मुलींना जाता - येता कायमच असुरक्षित वाटते. वसतिगृहात दरवाज्याला साधे लॉक नाही अशा स्थितीत या मुली कशा राहणार?

या आरोपींना तात्काळ अटक झाली पाहिजे. राज्यातील मुलींच्या वसतिगृहाची सुरक्षा वाढवली पाहिजे. या वसतिगृहात तात्काळ सीसीटीव्ही बसवले पाहिजे. तसेच राज्यातील सर्व मुलींच्या वसतिगृहात खबरदारी घेतली पाहिजे. मुख्यमंत्री आणि गृहमंत्र्यांच्या शहरात मुली सुरक्षित नसतील तर इतर ठिकाणी मुलींची काय हालत असेल? या मुलींच्या सुरक्षेची जबाबदारी सरकारने झटकू नये," अशी पोस्ट सोशल मीडियावर काँग्रेसचे नेते विजय वडेट्टीवार यांनी केली आहे.