जगातला सगळ्यात मोठा स्कायवॉक अमरावतीत; मोदी सरकारने दिली बांधकामाची परवानगी

केंद्राच्या परवानगीमुळे आता चिखलदरा येथील स्काय वॉकचे काम लवकरच पूर्णत्वास जाण्याची चिन्हे आहेत. पर्यटन मंत्री आदित्य ठाकरे व पालकमंत्री यशोमती ठाकूर यांच्यात नुकतीच याबाबत बैठक झाली होती. तसेच केंद्र शासनाकडून परवानगी मिळण्यासाठी राज्य शासनाने पाठपुराव्याची मागणी यशोमती ठाकूर यांनी केली होती. त्यानुसार तात्काळ पाठपुरावा होऊन केंद्र सरकारची परवानगी प्राप्त झाली आहे. त्यामुळे स्कायवॉक विकासाचा मार्ग मोकळा झाला आहे.

“आदित्य ठाकरेंनी केंद्राचे अडथळे दूर करण्याचं आश्वासन पूर्ण केलं”

अमरावतीचे पालकमंत्री यशोमती ठाकूर म्हणाल्या, “केंद्र सरकारने चिखलदरा येथील स्काय वॉकचे अडथळे काढून टाकले आहेत. याबाबत आम्हाला परिपत्रक मिळालं आहे. २ दिवसांपूर्वीच राज्याचे पर्यटनमंत्री आदित्य ठाकरे यांनी केंद्राच्या स्तरावरील अडथळे दूर करण्याचं आश्वासन दिलं होतं. यानंतर आता केंद्र सरकारने यावर प्रतिसाद दिलाय. अमरावतीत स्कायवॉक निर्माण करणं या जिल्ह्यासाठी अतिशय महत्त्वाचा पर्यटनाचा भाग आहे.”

हेही वाचा : VIDEO: “काय तमाशा लावलाय, तुमचे हे धंदे बंद करा”, अमरावतीत माजी कृषी मंत्री अनिल बोंडे आणि पोलिसांमध्ये शाब्दिक चकमक

“अमरावतीतील या स्कायवॉकसाठी मुख्यमंत्री उद्धव ठाकरे यांच्या कार्यालयातून पाठपुरावा होत आहे. त्यामुळे मी मुख्यमंत्री उद्धव ठाकरे आणि आदित्य ठाकरे यांचे आभार मानते,” असंही यशोमती ठाकूर यांनी नमूद केलं.