भोंगा वादात खासदार नवनीत राणांची उडी; म्हणाल्या, “हनुमान जंयतीनिमित्त मी आणि रवी राणा…”

आज देशभरामध्ये हनुमान जयंती साजरी केली जात आहे. याचनिमित्ताने प्रसारमाध्यमांशी बोलताना अमरावतीच्या खासदार नवनीत राणा यांनी आपण आज हनुमान मंदिरावर भोंगा लावून हनुमान चालीसाचं पठण करणार असल्याचं सांगितलं. मी आणि आमदार रवी राणा दोघेही हनुमान मंदिरामध्ये जाऊन हनुमान चालीसाचं पठण करणार आहोत. आम्ही हे आजच करत नसून मागील अनेक वर्षांपासून करतोय, असंही नवनीत राणा यांनी सांगितलं. रवीनगरमधील हनुमान मंदिरावर भोंगा लावून हनुमान चालीसाचं पठण करणार असल्याचं नवनीत राणा म्हणाल्यात.

काही दिवसांपूर्वीच नवनीत राणा आणि रवी राणा हे रवीनगरमधील एका धार्मिक कार्यक्रमासाठी गेले होते. तिथे त्यांनी कार्यक्रमासाठी उपस्थित असणाऱ्या हजारो महिलांसोबत बसून हनुमान चालीसा पठण केलं होतं. दोन तास त्यांनी हनुमान चालीसा पठण केल्याने या कार्यक्रमाची अमरावतीमध्ये चांगलीच चर्चा झाली होती.