भरधाव कंटेनरची तीन गाड्यांना धडक; दोन जखमी, महामार्गावर काही तास वाहतूक कोंडी…

या अपघातात महिंद्रा पिकअप, टाटा नेक्सॉन, स्विफ्ट डिझायर आणि एका दुचाकीचा समावेश होता. या अपघातात तिन्ही चारचाकी गाड्यांचे मोठ्या प्रमाणात नुकसान झाले असून स्विफ्ट डिझायर कारमधून प्रवास करणारे दोघेजण जखमी झाले आहेत.

खेड तालुक्यातील वेरळ इथे गेली अनेक वर्ष मुंबई गोवा महामार्ग हा अपूर्ण अवस्थेत असल्याचे पहावयास मिळत आहे. महामार्गावरील या ठिकाणी यापूर्वी देखील छोटे-मोठे अनेक अपघात झाले आहे तरी देखील अद्याप महामार्ग विभागाकडून या रस्त्याचे काम पूर्णत्वास नेले जात नसल्याचे दिसून येत आहे. याच अपूर्ण कामाचा फटका पुन्हा एकदा महामार्गावरून प्रवास करणाऱ्या वाहनधारकांना सोसावा लागण्याची पाहावयास मिळाले.

मुंबईहून गोव्याच्या दिशेने वेगात जाणारा कंटेनर हा भोस्ते घाट उतरून आल्यानंतर वेरळ गावातील महामार्गावरील डायव्हर्झन इथे आला असता सर्वप्रथम समोर निघालेल्या टाटा नेक्सन या कारला पाठीमागून धडक दिली. या धडकेनंतर पुढे असलेल्या दुचाकी ला पाठीमागून धडकली. तसेच यावेळी समोरून येणाऱ्या महिंद्रा पिकअपला या भरधाव कंटेनरने धडक दिली. त्यानंतर मुंबईच्या दिशेने समोर निघालेल्या स्विफ्ट डिझायर कार वर हा कंटेनर पलटी झाला. यामध्ये कारचा पूर्णपणे चेंदामेंदा झाला.

सुदैवाने या कारमधून प्रवास करणारे दोघेजण बचावले असले तरी त्यांना दुखापत झाल्याची माहिती समोर येत आहे. या अपघाताची माहिती मिळतात तात्काळ स्थानिक नागरिकांनी या कारमधील प्रवाशांना मदत ग्रुपचे प्रसाद गांधी यांच्या मदतीने वैद्यकीय उपचारासाठी रुग्णालयात दाखल करण्यात आले आहे. या अपघातानंतर महामार्गावर दोन्ही बाजूकडून वाहतूक कोंडी झाल्याचे चित्र पहावयास मिळत होते.

तर महामार्गावर या कंटेनर ट्रक मधील केमिकल सदृश्य लिक्वीड देखील सर्वत्र पसरले होते. या अपघाताची माहिती मिळतात खेड पोलिसांचं महामार्ग वाहतूक पोलीस लोटे यांनी देखील तात्काळ घटनास्थळी धाव घेऊन अपघातग्रस्तांना मदत केली व काही तासाने वाहतूक सुरळीत केली.