पंढरपूर विधानसभा मतदारसंघातील पोटनिवडणुकीमध्ये भाजपाच्या समाधान अवताडे यांनी विजय मिळवला आहे. पहिल्या फेरीपासून शेवटच्या काही फेऱ्यांपर्यंत हा सामना अगदी अटीतटीचा झाला. अखेर अवताडे यांनी महाविकास आघाडीचे उमेदवार असणाऱ्या राष्ट्रवादीच्या भगीरथ भालके यांचा तीन हजार ७१६ मतांनी पराभव केला. महाविकास आघाडीतील घटक पक्ष आणि भाजपाने ही निवडणूक प्रतिष्ठेचा मुद्दा केली होती. पंढरपूर निवडणुकीत जनतेने ठाकरे सरकारविरोधात कौल दिल्याची पहिली प्रतिक्रिया अवताडे यांनी प्रसारमाध्यमांशी बोलताना दिलीय. मतमोजणी सुरु झाल्यानंतर पहिल्या फेरीत भाजपाच्या समाधान अवताडेंनी ४५० मतांनी आघाडी घेतली होती. पहिल्या फेरीत अवताडेंना २ हजार ८४४ तर भालकेंना २ हजार ४९४ मतं मिळाली. दुसऱ्या फेरीत मात्र भालकेंनी ५०० हून आधिक मतांची आघाडी मिळवली. दुसऱ्या फेरीत भालकेंना ३ हजार ११२ तर अवताडेंना २ हजार ६४८ मतं मिळाली. तिसऱ्या फेरीअखेरीस भालकेंनी ६३५ मतांची आघाडी मिळवलीय. भालकेंना तिसऱ्या फेरीनंतर एकूण ८ हजार ६१३ मतं मिळाली आहेत तर आवताडेंना ७ हजार ९७८ मतं मिळाली आहेत. सातव्या फेरीपासून मात्र अवताडेंनी आघाडी घेतली आणि ती शेवटपर्यंत कायम ठेवली. आमदार भारत भालके यांच्या निधनामुळे पंढरपुरात पोटनिवडणूक लागली. त्यामुळे आता भारत भालके यांचेच पुत्र भगीरथ भालके यांना पंढरपूरची जनता साथ देते, की डाव उलटवून समाधान अवताडे यांच्या गळ्यात विजयाची माळ घातले याकडे साऱ्या राज्याचं लक्ष लागून राहिलं होतं. अखेर हा निकाल अवताडे यांच्या बाजूने लागला. पंढरपूर विधानसभा पोटनिवडणुकीत एकूण ३ लाख ४० हजार ८८९ मतदार असून एकूण ५२४ मतदान केंद्रांवर मतदान प्रक्रिया राबवण्यात आली होती. गेल्या महिन्याभरात करोनाच्या निर्बंधांमध्ये देखील पंढरपूरसाठी या निर्बंधांमध्ये शिथिलता देण्यात आली होती. या काळात राष्ट्रवादी काँग्रेसचे आमदार आणि राज्याचे उपमुख्यमंत्री अजित पवार यांच्याच सभेमध्ये झालेली गर्दी आणि करोना नियमांची पायमल्ली हा चर्चेचा आणि राजकारणाचा देखील विषय ठरला होता. त्याचवेळी भाजपाकडून देखील माजी मुख्यमंत्री देवेंद्र फडणवीस आणि इतर दिग्गज नेत्यांनी पंढरपूरमध्ये सभा घेतल्या होत्या. दोन्ही बाजूंनी ही निवडणूक प्रतिष्ठेची करण्यात आल्यामुळे या जागेच्या निकालांकडे सगळ्यांचं लक्ष लागलं होतं. या विजयानंतर भाजपाच्या अनेक नेत्यांनी ट्विटरवरुन अवताडे यांचं अभिनंदन केलं आहे. १) पंढरपूर-मंगळवेढा पोटनिवडणुकीमध्ये भारतीय जनता पार्टी चे उमेदवार श्री समाधान आवताडे विजयी झाल्याबद्दल त्यांचे अभिनंदन व पुढील वाटचालीस शुभेच्छा. pic.twitter.com/qiOFQJ5BF0 — Chhatrapati Udayanraje Bhonsle (@Chh_Udayanraje) May 2, 2021 २) भारतीय जनता पार्टीवर विश्वास ठेवून आपल्या 'समाधाना'साठी भाजपाला निवडून दिल्याबद्दल मायबाप मतदारांचे मनःपूर्वक धन्यवाद! उद्योगशील जनसेवक श्री समाधान महादेव आवताडे हे विजयी झाल्याबद्दल त्यांचे सहर्ष अभिनंदन! pic.twitter.com/KVNcSPK4hl — Chandrakant Patil (@ChDadaPatil) May 2, 2021 ३) अभिनंदन, 'आमदार' समाधान आवताडे ! पंढरपूर-मंगळवेढा विधानसभा पोटनिवडणुकीत विजयी झाल्याबद्दल आमदार श्री. समाधान आवताडे यांचे मनःपूर्वक अभिनंदन ! मा. @Dev_Fadnavis जी आणि मा. @ChDadaPatil दादा यांच्या नेतृत्वावर आणि महाविकास आघाडीच्या नाकर्तेपणावर शिक्कामोर्तब म्हणजे हा विजय ! pic.twitter.com/c99Aok3n9f — Murlidhar Mohol (@mohol_murlidhar) May 2, 2021 ४) पंढरपूर विधानसभा पोटनिवडणुकीतील दैदिप्यमान विजय हेच पुन्हा सिद्ध करतोय की महाराष्ट्रातील जनता भक्कमपणे भाजपा सोबतच आहे. विधानसभा विरोधी पक्षनेते श्री @Dev_Fadnavis जी, महाराष्ट्र भाजपा अध्यक्ष श्री @ChDadaPatil जी आणि विजयी उमेदवार श्री समाधान आवताडे यांचे मनःपूर्वक अभिनंदन! — Poonam Mahajan (@poonam_mahajan) May 2, 2021 पंढरपूर-मंगळवेढा विधानसभा मतदारसंघातल्या ३५ गावांच्या पाण्याचा प्रश्न हा मुद्दा यंदाच्या निवडणुकीत विशेष चर्चेचा आणि राजकीय सभांचा विषय ठरला. त्याशिवाय, राज्यातील करोनाच्या संकटाची हाताळणी हा मुद्दा भाजपाकडून मोठा करण्यात आला. रेमडेसिविर, ऑक्सिजन, व्हेंटिलेटर, लसींचा तुटवडा आणि पुरवठा या मुद्द्यांवरून दोन्ही बाजू एकमेकांसमोर उभ्या ठाकल्याचं दिसून आलं.
