कराड : नवरात्रोत्सव हा माता दुर्गेचा भक्तिभावाने साजरा होणारा पवित्र उत्सव आहे. या काळात व्यावसायिक स्वरूपात आयोजित होणाऱ्या दांडिया- गरबा कार्यक्रमांवर बंदी घालावी, अशी ठाम मागणी कराडमध्ये सकल हिंदू समाजाने केली आहे. अशा कार्यक्रमांमुळे महिलांच्या सुरक्षेचे प्रश्न निर्माण होतात, तसेच हिंदू संस्कृतीचे विकृतीकरण होत असल्याचा आरोप करत असे कार्यक्रम झाल्यास तीव्र पडसाद उमटतील, असा सज्जड इशारा या वेळी पोलीस व प्रशासनाला दिला आहे.
सकल हिंदू समाजाच्या वतीने पोलीस प्रशासनाला या संदर्भातील निवेदन देण्यात आले. या निवेदनावर अनेक समाजबांधवांची नावे आहेत. त्यानंतर शासकीय विश्रामगृहात आयोजित पत्रकार परिषदेत समाजाने आपली या बाबतची आक्रमक भूमिका स्पष्ट केली. या वेळी समाजबांधवांनी सांगितले, की नवरात्रोत्सव हा भक्तिभाव, भजन- कीर्तन आणि पारंपरिक दांडियांचा उत्सव आहे. परंतु, कराड शहर व परिसरातील काही उपाहारगृहे (हॉटेल्स), हिरवळ (लॉन्स) आणि उत्सव आयोजक संस्था (इव्हेंट कंपन्या) हे व्यावसायिक फायद्यासाठी तथाकथित ‘डिस्को गरबा’ आयोजित करत असल्याचे निदर्शनास येते. यामुळे महिलांच्या सुरक्षेचे गंभीर प्रश्न निर्माण होतात, तसेच चुकीच्या प्रवृत्तींना खतपाणी मिळते आणि उत्सवाचे पावित्र्य कलंकित होते. नवरात्राचे पावित्र्य नष्ट करून समाजासमोर चुकीचा संदेश दिला जात आहे. यामुळे महिलांचा सन्मान धोक्यात येतो आणि हिंदू समाजाच्या भावना दुखावल्या जातात. अशा कार्यक्रमांना परवानगी दिल्यास तीव्र आंदोलनाची भूमिका घेतली जाईल, असा इशारा पत्रकार परिषदेत देण्यात आला.
या वेळी समाजाने प्रशासनाकडे कराड परिसरात व्यावसायिक दांडिया- गरबा या कार्यक्रमांना परवानगी देऊ नये, अशा कार्यक्रमांचे आयोजन झाल्यास आयोजकांवर कठोर कारवाई करावी, उत्सव काळात महिलांच्या सुरक्षेसाठी पोलिसांनी विशेष दक्षता घ्यावी, असे कार्यक्रम संबंधित समाजापुरते मर्यादित राहावेत; अन्य धर्मीयांना प्रवेश नाकारावा, हॉटेल, लॉन व कॅफेमालकांनी आपली ठिकाणे अशा व्यावसायिक कार्यक्रमांना देऊ नयेत, अशा प्रमुख मागण्या करण्यात आल्या.
दरम्यान, गणेशोत्सव काळात प्रशासनाचे उत्कृष्ट नियोजन व देखावे आणि विसर्जन मिरवणुकांसाठी केलेल्या सहकार्याबद्दल कृतज्ञता व्यक्त करताना, त्याच धर्तीवर नवरात्रोत्सवातही प्रशासनाने सहकार्य करावे, अशी मागणी करण्यात आली आहे. तसेच, ध्वनिक्षेपक परवाने नियमानुसार द्यावेत व दसऱ्यानंतर दोन दिवस मूर्ती विसर्जनासाठी मुभा द्यावी, अशाही मागण्या करण्यात आल्या.
