शेतकरी संघटनेने कंबर कसली, स्थानिक स्वराज्य संस्थेच्या निवडणुका लढवण्याची केली घोषणा

हेही वाचा >>> …तर पुन्हा एकदा मास्क वापरण्याचा निर्णय घ्यावा लागेल – अजित पवारांचा सूचक इशारा!

शेतकरी संघटना स्थानिक पातळीवर समविचारी पक्षांसोबत युती करून निवडणूक लढवणार आहे. शहरी विकासाच्या कामात शेतकरी संघटना महापालिकेतील उमेदवारांना मदत करण्यास तयार आहे. कारण शहरात येणारी मंडळी ही ग्रामीण भागातूनच आलेली आहेत. काँग्रेस, भाजप, शिवसेना व राष्ट्रवादी काँग्रेस या राजकीय पक्षांसोबत सध्यातरी शेतकरी संघटनेची युती होणार नाही. कारण शेतकरी हिताचे कायदे तयार करणे व शेतकरी विरोधी कायदे रद्द करणे, या विषयावर ते शेतकरी संघटनेसोबत एकत्र येऊ शकत नाहीत. संघटनेला स्वतःच्या बळावर राजकीय पक्ष विरहित निवडणूक लढावी लागणार आहे. पुढील निवडणुका शेतकरी संघटनेच्या झेंड्याखाली स्वतंत्रपणे लढण्यात येतील, असेही धनंजय पाटील काकडे यांनी म्हटले आहे.

हेही वाचा >>> काँग्रेसच्या ‘एक व्यक्ती एक पद’ ठरावाची अंमलबजावणी, आमदार विकास ठाकरे यांनी दिला शहराध्यक्ष पदाचा राजीनामा

आंबेडकरी चळवळीतील सर्व गट, संभाजी ब्रिगेड तसेच शेतकऱ्यांसाठी लढणाऱ्या सर्व लहान-मोठ्या संघटना, लोक चळवळीतील सर्व लहान गटांनी ही निवडणूक शेतकरी संघटनेच्या झेंड्याखाली एकत्र येऊन लढवावी. तरच शेतकऱ्यांना व मजुरांना आर्थिक स्वातंत्र्य मिळेल. या देशात भ्रष्टाचारावरून फक्त राजकीय पक्ष एकमेकांवर केवळ आरोप करतात. सर्वच आमदार-खासदारांचे हिशेब तपासणे आता गरजेचे आहे. या नेत्यांनी शेतकऱ्यांच्या घामाने जमा झालेल्या शासन तिजोरीत फक्त चोऱ्या केल्या आहे. भारत देशाला लागलेला शेतकरी आत्महत्येचा कलंक जर मतदारांनी आता मिटवला नाही तर तो पुढेही मिटणार नाही. शेतकरी चळवळीला बळकटी आणण्यासाठी, न्याय व हक्कासाठी सर्वांनी शेतकरी संघटनेला पाठिंबा द्यावा, असे आवाहन शेतकरी संघटनेचे विदर्भ प्रमुख धनंजय पाटील काकडे यांनी निवेदनाद्वारे केले आहे.