Sikandar sheikh and Mahendra will participate in the Bhima wrestling tournament solapur ssb 93

भीमा साखर कारखान्याचे संस्थापक भीमराव महाडिक यांच्या स्मरणार्थ आणि भीमा परिवाराचे अध्वर्यू खासदार धनंजय महाडिक यांच्या वाढदिवसाचे औचित्य साधून या कुस्ती स्पर्धेचे आयोजन करण्यात आले आहे.

Written by लोकसत्ता टीम

सोलापूर

January 22, 2023 22:15 IST

भीमा कुस्ती स्पर्धेत सिकंदर व महेंद्र सहभागी होणार (संग्रहित छायाचित्र)

महाराष्ट्र केसरी कुस्ती स्पर्धेत आघाडीचा मल्ल सिकंदर शेख याच्या पराभवाची जास्त चर्चा होत असतानाच सिकंदर शेख आणि त्याला पराभूत करणाऱ्या महेंदूर गायकवाड हे दोघेही येत्या २४ जानेवारी रोजी सोलापुरात मोहोळ तालुक्यातील टाकळी सिकंदर येथील भीमा सहकारी साखर कारखान्याच्या कार्यस्थळावर आयोजित कुस्तीच्या फडात सहभागी होणार आहेत. परंतु, त्यांची कुस्ती मात्र होणार नाही. दोघेही वेगवेगळ्या मल्लांबरोबर लढणार आहेत.

भीमा साखर कारखान्याचे संस्थापक भीमराव महाडिक यांच्या स्मरणार्थ आणि भीमा परिवाराचे अध्वर्यू खासदार धनंजय महाडिक यांच्या वाढदिवसाचे औचित्य साधून आयोजित या कुस्ती फडात प्रथम क्रमांकाची भीमा केसरी किताबासाठी कुस्ती सिकंदर शेख आणि पंजाब केसरी भूपेंद्रसिंह अजनाला यांच्यात होणार आहे. विजेत्या पैलवानाला रोख बक्षीस आणि चांदीची गदा दिली जाणार आहे.

हेही वाचा – शुभांगी पाटील यांच्याकडून बाळासाहेब थोरातांची भेट घेण्याचा प्रयत्न; सत्यजीत तांबेंनी एका वाक्यात दिली प्रतिक्रिया; म्हणाले…

या फडामध्ये अन्य चार प्रमुख लढती होणार आहेत. महाराष्ट्र केसरी कुस्ती स्पर्धेत उपान्त्य फेरीत सिंकदर शेखला गुणांच्या आधारे पराभूत केलेल्या महेंद्र गायकवाड याची भीमा वाहतूक केसरीसाठीची चार क्रमांकाची कुस्ती पंजाबच्या गोरा अजनालाबरोबर लढली जाणार आहे. द्वितीय क्रमांकाच्या भीमा साखर केसरी किताबाची कुस्ती भारत केसरी माऊली जमदाडे आणि बालारफी शेख यांच्यात होणार आहे. तर भीमा कामगार केसरी किताबासाठी मुंबई महापौर केसरी गणेश जगताप आणि अक्षय शिंदे यांच्यात लढत होणार आहे.

हेही वाचा – जळगाव जिल्हा दूध संघातील नोकरभरती रद्द; अध्यक्ष मंगेश चव्हाण यांची माहिती, खडसेंना दणका

भीमा सभासद केसरीसाठी पाच क्रमांकाच्या कुस्तीसाठी अक्षय मंगवडे आणि संतोष जगताप हे मल्ल भिडणार आहेत. भीमा सहकारी साखर कारखान्याचे अध्यक्ष विश्वराज महाडिक यांनी माहिती दिली. संपूर्ण कुस्ती फडासाठी नऊ लाख रुपयांपेक्षा अधिक बक्षिसे दिली जाणार आहेत.

First published on: 22-01-2023 at 22:15 IST

TOPICSकुस्ती Wrestling सोलापूर Solapur

मराठीतील सर्व महाराष्ट्र बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Sikandar sheikh and mahendra will participate in the bhima wrestling tournament solapur ssb

सोलापूर : भीमा कुस्ती स्पर्धेत सिकंदर व महेंद्र सहभागी होणार, पण..