सावंतवाडी : गणेशोत्सव शांततेत आणि सुरळीत पार पाडण्यासाठी वाहतूक नियमांविषयी नागरिकांनी सहकार्य करावे, असे आवाहन अपर पोलीस अधीक्षक नियोमी साटम यांनी केले आहे. गणेशोत्सवासाठी मुंबई, पुणे आणि इतर शहरांतून मोठ्या संख्येने चाकरमानी आपल्या गावी सिंधुदुर्गात येतात. या प्रवासात कोणाचीही गैरसोय होऊ नये, वाहतूक कोंडी होऊ नये आणि प्रवास सुरक्षित व्हावा यासाठी जिल्हा पोलीस दलाने वाहतूक नियोजन केले आहे.
वाहतुकीचे नियम
गणेशोत्सवादरम्यान मुंबई-गोवा राष्ट्रीय महामार्ग क्रमांक ६६ वर अवजड वाहनांच्या वाहतुकीवर काही निर्बंध घालण्यात आले आहेत.
हे निर्बंध:
- २३ ऑगस्ट, दुपारी २ वाजेपासून ते २८ ऑगस्ट, रात्री ११ वाजेपर्यंत: १६ टन किंवा त्यापेक्षा जास्त वजन असलेल्या सर्व वाहनांना (उदा. ट्रक, ट्रेलर, मल्टीएक्सल) मुंबई-गोवा महामार्गावर प्रवेश बंद राहील.
- ३१ ऑगस्ट, सकाळी ८ वाजेपासून रात्री ११ वाजेपर्यंत आणि २ सप्टेंबर, सकाळी ८ वाजेपासून रात्री ११ वाजेपर्यंत: याच कालावधीत, पाच व सात दिवसांच्या गणपती विसर्जन आणि काही अंशी परतीच्या प्रवासासाठी, १६ टन किंवा त्यापेक्षा जास्त वजन असलेल्या वाहनांची वाहतूक पूर्णपणे बंद राहील.
- ६ सप्टेंबर, सकाळी ८ वाजेपासून ते ७ सप्टेंबर, रात्री ८ वाजेपर्यंत: अनंत चतुर्दशीच्या (११ दिवसांचे गणपती विसर्जन) निमित्ताने, १६ टन किंवा त्यापेक्षा जास्त वजन असलेल्या वाहनांना मुंबई-गोवा महामार्गावर वाहतुकीस पूर्णपणे बंदी घालण्यात आली आहे.
हे नियम जीवनावश्यक वस्तूंची वाहतूक करणाऱ्या वाहनांना लागू नाहीत. दूध, पेट्रोल, डिझेल, स्वयंपाकाचे गॅस सिलेंडर, लिक्विड मेडिकल ऑक्सिजन, अन्नधान्य, भाजीपाला आणि इतर नाशवंत वस्तू घेऊन जाणाऱ्या वाहनांना प्रवास करण्यास मुभा आहे. तसेच, महामार्गाच्या रुंदीकरण आणि दुरुस्तीच्या कामात असलेल्या वाहनांना देखील ही बंदी लागू होणार नाही. मात्र, अशा वाहनांना संबंधित वाहतूक विभाग किंवा महामार्ग पोलिसांकडून प्रवेश पत्र घेणे आवश्यक आहे.
सिंधुदुर्ग पोलिसांनी सर्व वाहनधारक आणि चालकांना आवाहन केले आहे की, त्यांनी शासनाने दिलेल्या आदेशाचे काटेकोरपणे पालन करावे. जड-अवजड वाहनांवर बंदी असलेल्या तारखांना त्यांनी महामार्गावरून प्रवास टाळावा. सर्वांनी सहकार्य केल्यास गणेशोत्सव काळात वाहतूक नियोजन सुरळीत होईल आणि प्रवास सुरक्षित होईल.
