अफजलखान वध शिल्पासंदर्भात मुख्यमंत्र्यांबरोबर बैठक घेणार, उदयनराजे भोसले यांचे आश्वासन

प्रतापगड प्राधिकरण समितीची बैठक जिल्हाधिकारी संतोष पाटील यांच्या दालनामध्ये पार पाडली. बैठकीला दूरदृश्य प्रणालीद्वारे पालकमंत्री शंभूराज देसाई, जिल्हा परिषदेच्या मुख्य कार्यकारी अधिकारी याशनी नागराजन, उपवनसंरक्षक अमोल सातपुते, प्रांत योगेश खरमाटे, तहसीलदार सचिन मस्के, पुरातत्त्व विभागाचे संचालक विलास वाहने, अशासकीय समितीचे सदस्य नितीन शिंदे, मिलिंद एकबोटे, शरद पोंक्षे, सदाशिव टेंटविलकर, सोमनाथ धुमाळ, चंद्रकांत पाटील, विजय नायडू, पंकज चव्हाण आदी उपस्थित होते.

प्रतापगड प्राधिकरण समितीच्या बैठकीमध्ये राज्य शासनाने दिलेल्या १२७ कोटी रुपयांच्या विकासकामांचा आढावा घेण्यात आला. यामध्ये प्रतापगड किल्ला जतन, संवर्धन निविदा मान्यता या संदर्भातील प्रशासकीय मंजुरी घेऊन याबाबत निविदा काढणे, आराखड्यातील उर्वरित कामांची परिपूर्तता, विद्युत सुविधा, प्रतापगडच्या पायथ्याला प्रशस्त पार्किंग इत्यादी कामांचा आढावा घेण्यात आला. प्रतापगड देवस्थानाच्या जमिनी आहेत तेथे मोठ्या प्रमाणावर वनराई आहे. तेथे वृक्षतोड झाल्यास पुन्हा वृक्षारोपण करून हा परिसर पर्यावरण समृद्ध करणे, तसेच विकासकामांसाठी गरज पडल्यास प्राधिकरण मान्यतेने जमीन वर्ग करणे याबाबत खासदार उदयनराजे भोसले यांनी समितीचे अध्यक्ष या नात्याने मंजुरी दिली.

हिंदू एकता आंदोलन समितीच्या वतीने प्रतापगडावर अफजलखान वधाचे शिल्प २७ नोव्हेंबरपर्यंत बसवले गेले नाही, तर आम्ही सातारा, सांगली, कोल्हापूर या तीन जिल्ह्यांतील शिवप्रेमी प्रतिशिल्प वाजतगाजत नेऊन प्रतापगड पायथ्याला बसवू, असा इशारा देण्यात आला होता. याबाबत नितीन शिंदे यांनी तब्बल २४ वर्षे पाठपुरावा केलेला आहे.या संदर्भात राज्य शासन विविध स्वरूपाची कारणे देत आहे. त्यामुळे आंदोलक आंदोलनाच्या पवित्र्यात आहेत अशा तीव्र भावना त्यांनी व्यक्त केल्या. या संदर्भात उदयनराजे भोसले यांनी शिंदे व मिलिंद एकबोटे यांना मुख्यमंत्री देवेंद्र फडणवीस यांची वेळ घेऊन तातडीने बैठक घेऊ, असे आश्वासन दिले.

किल्ले प्रतापगड हे छत्रपती शिवाजी महाराजांच्या दूरदृष्टीचे गौरवशाली प्रतीक आहे. या ठिकाणी सर्व वयोगटातील लोक मोठ्या संख्येने येत असतात. अनेकदा इच्छा असूनही लहान मुले, वयस्करांना गडावर चढता येत नाही. त्यांच्यासाठी रोप वे, फर्निक्युलर यंत्रणा यांची सुविधा आवश्यक आहे. तसेच सुसज्ज वाहनतळही आवश्यक आहे. प्रतापगडाच्या पायथ्याला वन विभागाच्या खालोखाल प्रतापगड देवस्थानाची जमीन आहे. या सुविधांसाठी आवश्यकता भासल्यास देवस्थानाची जमीन उपलब्ध करून दिली जाईल.- उदयनराजे भोसले, खासदार तथा प्रतापगड किल्ला विकास प्राधिकरणाचे अध्यक्ष