“शेतकरी संकटात; मुख्यमंत्री बिहारमध्ये प्रचारात”, उद्धव ठाकरे यांची बीडमध्ये टीका

राज्य सरकारकडून नुकसानीपोटी शेतकऱ्यांना देण्यात आलेले सर्वांत मोठे पॅकेज नाही, तर शेतकऱ्यांना दिलेला आजवरचा सर्वांत मोठा दगा असल्याची टीका ठाकरे यांनी केली. ते म्हणाले, ‘शेतकऱ्यांना कर्जमाफी नाही, तर कर्जमुक्ती दिली पाहिजे. मुख्यमंत्री असताना कसलाही अभ्यास न करता दोन लाखांची कर्जमाफी दिली होती.’

राज्य सरकारने नुकसानग्रस्त शेतकऱ्यांना मदत जाहीर केली. मात्र, ती मदत शेतकऱ्यांना न मिळाल्याने सरकारचा खरा चेहरा उघडा पाडण्यासाठी मी आलो असल्याचे ठाकरे म्हणाले.

‘मी खरं काय आणि खोटं काय हे पाहायला आलो आहे. कधीही कोसळली नाही अशी आपत्ती मराठवाड्यावर कोसळली असून, अस्मानी म्हणजे नैसर्गिक संकट आणि सुलतानी म्हणजे इथल्या कारभाऱ्यांचे संकट आहे. शरद पवार केंद्रीय कृषिमंत्री असताना पहिली कर्जमाफी देण्यात आली होती. मुख्यमंत्री असताना मी कसल्याही अभ्यासात वेळ न घालवता करता दोन लाखांपर्यंत कर्ज माफ केले होते. बँकांचा फायदा होऊ न देता जूनमध्ये तुम्ही कर्जमुक्ती कशी करणार हे सांगा,’ असे आव्हान त्यांनी दिले.

‘सरकार कर्जमाफीसाठी पंचांग बघत आहे. त्यांच्या खुर्चीवर अनेक जणांची वक्रदृष्टी आहे. राज्य सरकारने कर्जमाफीसाठी पुढच्या वर्षी जूनचा मुहूर्त काढला आहे. असे असल्यास शेतकऱ्यांनी खरिपाचे हप्ते कसे भरायचे, हप्ते न भरल्यास पुन्हा कर्ज मिळणार की नाही हेदेखील अस्पष्ट असल्याने शेतकरी पुन्हा संकटात येईल. बच्चू कडूंनी आंदोलन केले; त्यांना मुख्यमंत्र्यांनी बोलावून घेतले आणि कोपराला गूळ लावून सोडून दिले. तो गूळ दिसतही नाही आणि खाताही येत नाही, अशी परिस्थिती आहे. सरकार दगाबाज असेल, तर सरकारला दग्यानेच मारले पाहिजे, असे आवाहनही त्यांनी केले.

उपमुख्यमंत्री अजित पवार यांच्यावर टीका

कर्जमुक्ती नाही केली, तर नाव लावणार नाही असे अजित पवार म्हणाले होते. तोदेखील व्हिडिओ मी शोधत आहे. उपमुख्यमंत्र्यांनी कर्जमुक्तीसाठी काय केले हे त्यांना विचारले पाहिजे. शेतकऱ्यांचे वीजबिल माफ झाले, तरी आता खरडून गेलेल्या जमिनीत शेतकरी काय पिकविणार?