“महाराष्ट्राचं भल व्हावं, असं वाटत असेल तर…”; नितेश राणेंच्या ‘त्या’ विधानावरून विजय वडेट्टीवारांचं शिंदे सरकारवर टीकास्र!

विजय वडेट्टीवार यांनी एक्स या समाज माध्यमावर नितेश राणे यांचा व्हिडीओ पोस्ट करत सत्ताधाऱ्यावर टीका केली आहे. हे दंगलखोर कोण आहे? सरकारने यांच्यावर कारवाई का केली नाही? असा प्रश्न त्यांनी मुख्यमंत्र्यांना विचारला आहे. तसेच नितेश राणे यांच्यावर कारवाई करावी, अशी मागणीही त्यांनी केली आहे.

हेही वाचा – एक छावणी लुटण्याइतके शिवाजी महाराज छोटे नव्हते, जितेंद्र आव्हाड यांचे फडणवीस यांना प्रत्युत्तर

नेमकं काय म्हणाले विजय वडेट्टीवार?

“मुख्यमंत्री म्हणतात की विरोधकांना महाराष्ट्र अशांत ठेवायचा आहे, मग हे आमदार कोण आहेत? कोणत्या पक्षाचे आहेत? कोणाला घुसून मारण्याची भाषा करत आहेत? राज्याचे गृहविभाग कुठं आहे? गृहमंत्री गप्प का? अद्याप कोणती कारवाई का नाही नाही?”, असे प्रश्न विजय वडेट्टीवार यांनी उपस्थित केले आहेत.

पुढे बोलताना, “सरकार नितेश राणे यांच्यावर कारवाई करणार नाही आणि करूही शकत नाही. कारण सत्ताधाऱ्यांना अशा दंगलखोरांना तसेच गुंडांनाबरोबर घेऊन दंगल घडवायची आहे. हे लोक सत्तेसाठी महाराष्ट्र जाळायला निघाले आहेत”, असा आरोपही त्यांनी केला. “तुम्हाला महाराष्ट्राचे भल व्हावं, असे वाटत असेल तर या चिथावणीखोर आमदारावर कारवाई करा”, अशी मागणीही विजय वडेट्टीवार यांनी केली.

हेही वाचा – Eknath Khadse : “…अन्यथा मी राष्ट्रवादी काँग्रेस शरद पवार गटातच राहणार”, एकनाथ खडसेंचं मोठं विधान

नितेश राणे नेमकं काय म्हणाले होते?

अहमदनगरमध्ये रामगिरी महाराजांच्या समर्थनार्थ मोर्चा काढण्यात आला होता. या मोर्चात मोठ्या संख्येने लोक सहभागी झाले होते. या सभेला संबोधित करताना भाजपाचे आमदार नितीश राणे यांनी वादग्रस्त विधान केलं होतं. “आमच्या रामगिरी महाराजांविरोधात कोणी काही बोलले तर आम्ही मशिदींमध्ये घुसून त्यांची निवडून निवडून हत्या करू”, असा थेट इशारा त्यांनी दिला होता. तसेच “रामगिरी महाराजांनी सिन्नरमधील प्रवचणात जो मुद्दा मांडला तो सतत मांडत रहावा, संपूर्ण देश त्यांच्या पाठीशी आहे”, असेही ते म्हणाले होते.