कराड : पश्चिम घाटक्षेत्रातील दमदार आणि कोयना पाणलोटातील जोरदार पाऊस ओसरला आहे. त्यात कोयना धरणातील जलआवक घटल्याने धरणाचे सहा वक्री दरवाजे चार फुटांवर स्थिर ठेवून प्रतिसेकंद १९,७२४ क्युसेकचा (घनफूट) जलविसर्ग करण्यात येत आहे. धरणाच्या पायथा वीजगृहातून २,१०० क्युसेकचा जलविसर्ग कायम आहे.
पावसाचा ओसरलेला जोर आणि धरणातून घटवलेला जलविसर्ग यामुळे कृष्णा- कोयना नद्यांची जलपातळी अल्पशी घटून स्थिर राहणार आहे. सध्या कोयना धरणातून एकंदर २१,८२४ क्युसेकचा जलविसर्ग होत असताना, सातारा जिल्ह्यातील धोम, कण्हेर, तारळी, धोम- बलकवडी, उरमोडी धरणातूनही जलविसर्ग सुरूच आहे.
कोयनेच्या जलसाठ्यात २.१६ टीएमसी (अब्ज घनफूट) पाण्याची आवक होवून जलसाठा ८६.०४ टीएमसी (८१.७५ टक्के) झाला आहे. धरणातील पाण्याची आवक २६,२४३ क्युसेकवरून २५,००९ क्युसेकपर्यंत खाली आली आहे. कोयना पाणलोटात आज बुधवारी सायंकाळी पाचेवाजेपर्यंत गेल्या २४ तासात ३९.३३ मिमी. पाऊस झाला आहे. तर, यंदा आजवर सरासरी ३,२५१.६६ मिमी, (एकूण वार्षिक सरासरीच्या ६५.०३ टक्के) पावसाची नोंद आहे. मंगळवारी सकाळी आठ ते सायंकाळी सहा वाजेपर्यंत कोयना पाणलोटक्षेत्रात महाबळेश्वरला ११, नवजाला १९ तर, कोयनानगरला ५ मिमी. तर, अन्य धरणक्षेत्रात किरकोळ ते मध्यम पावसाचे चित्र आहे.
