अमिताभ बच्चन यांचा सर्वांत लोकप्रिय रिअॅलिटी शो ‘कौन बनेगा करोडपती’चा दहावा सिझन सध्या सुरू आहे. ‘केबीसी’च्या या पर्वात लहान मुलांनीही सहभाग घेतला आहे. बुद्धिमत्तेच्या जोरावर पैसे जिंकण्याची संधी देणाऱ्या या शोमध्ये येण्याचं अनेकांचं स्वप्न असतं. किंबहुना हे स्वप्न अनेकांनी आजवर पूर्ण केली आहेत. पण केबीसीच्या इतिहासात पहिल्यांदाच एकाला लाखो रुपये जिंकूनही रिकाम्या हाती परतावे लागले आहे.

बालदिनानिमित्त ‘केबीसी’मध्ये लहान मुलांसाठी विशेष भाग शूट करण्यात आला होता. या भागात नागपूरच्या ११ वर्षीय तुषित निकोसेला हॉट सीटवर बसण्याची संधी मिळाली. सहावीत शिकणाऱ्या तुषितने अत्यंत हुशारीने हा खेळ खेळण्यास सुरुवात केली. एकेका प्रश्नाची उत्तरं देत तो १२ व्या प्रश्नापर्यंत पोहोचला. तोपर्यंत त्याच्या सर्व ‘लाइफलाइन’ संपल्या होत्या. ‘ऑलिम्पिकमध्ये २३ सुवर्ण, तीन रौप्य आणि दोन कांस्य पदक पटकावलेला खेळाडू कोणता?’ असा प्रश्न त्याला विचारण्यात आला. या प्रश्नाचं उत्तर माहीत नसल्याने तुषितने खेळ सोडण्याचा निर्णय घेतला.

वाचा : या तेलुगू रिमेकमधून सुनील शेट्टीचा मुलगा करणार बॉलिवूडमध्ये पदार्पण

१२ प्रश्नांमध्ये तुषितने सहा लाख चाळीस हजार रुपयांची रक्कम जिंकली होती. पण अल्पवयीन असल्याने जिंकलेली ही रक्कम तो घरी घेऊन जाऊ शकला नाही. तुषित १८ वर्षांचा झाल्यानंतर त्याला ही रक्कम मिळेल असं बिग बींनी कार्यक्रमात सांगितलं.

First Published on November 15, 2018 12:59 pm