बॉलिवूड अभिनेता आयुष्मान खुरानाने आजवर हटके भूमिका साकारत प्रेक्षकांची मनं जिंकली आहेत. कधी रोमॅण्टिक तर कधी विनोदी भूमिकांमधून आयुष्मानने चाहत्यांची पसंती मिळवलीय. मात्र आता आयुष्मान एका वेगळ्या अंदाजात प्रेक्षकांच्या भेटीला येणार आहे. आयुष्मानच्या आगामी सिनेमाची नुकतीच घोषणा झालीय. हा सिनेमा रोमॅण्टिक किंवा विनोदी नसून हा पूर्णपणे अॅक्शन सिनेमा असणार आहे. नुकताच या सिनेमाचा टीझर सोशल मीडियावर रिलिज करण्यात आला आहे. या सिनेमाचं नाव 'अॅक्शन हीरो' असं असून आयुष्मान या सिनेमात मुख्य भूमिकेत झळकणार आहे. आयुष्मानाने देखील त्याच्या इन्स्टाग्राम अकाऊंटवर सिनेमाचा टीझर शेअर केलाय. या टीझर शेअर करत त्याने कॅप्शनमध्ये लिहिलं, "अडचण फक्त एकच आहे की मला भांडण्याचा अभिनय करता येतो…भांडता येत नाही…काही तरी वेगळं करण्यासाठी खूप उत्साही आहे." अशा आशयाचं कॅप्शन त्याने दिलंय. आयुष्मानच्या टीझरला त्याच्या चाहत्यांनी पसंती दिलीय. आयुष्मानाच्या या नव्या सिनेमाचा टीझर पूर्णपणे अॅनिमेटेड असल्याचं दिसतंय. या बॅकग्राउंडला फक्त आयुष्मानचा आवाज ऐकू येतोय. पहिल्यांदाचा आयुष्मानाचा अॅक्शन अंदाज या सिनेमात प्रेक्षकांना पाहायला मिळणार आहे. 'अॅक्शन हीरो' हा सिनेमा २०२२ सालामध्ये रिलीज होणार आहे. या सिनेमाचं शूटिंग भारतासह इंग्लडमध्ये होणार आहे. अनुरुद्ध अय्यर या सिनेमाचं दिग्दर्शन करणार आहेत.