5G प्रकरणी अभिनेत्री जुही चावलाला दिल्ली उच्च न्यायालयाचा मोठा दिलासा!

दिल्ली विभागीय न्यायालयाने जुही चावला हिला सबंधित याचिका फेटाळाना २० लाखांचा दंड ठोठावला होता. ही रक्कम कमी करत २ लाख रुपये करण्यात आल्याचं आज दिल्ली उच्च न्यायालयातील न्यायमूर्ती विपिन सिंघि आणि जसमीत सिंग यांच्या खंडपीठानं नमूद केलं.

नेमकं काय आहे प्रकरण?

अभिनेत्री जुही चावलानं गेल्या वर्षी दिल्ली उच्च न्यायालयात एक याचिका दाखल केली होती. देशात ५जी सेवांसदर्भातील अंमलबजावणी झाल्यास त्याचा जीवसृष्टीवर विपरीत परिणाम होईल, असं नमूद करतानाच जुही चावलानं या सेवांची देशात अंमलबजावणी केली जाऊ नये, अशी मागणी याचिकेमध्ये केली होती. मात्र, ऑनलाईन सुनावणीवेळी या सुनावणीची लिंक तिनं सोशल मीडियावर आणि इतर ठिकाणी शेअर केली होती. त्यावरून दिल्ली उच्च न्यायालयातील तत्कालीन एकसदस्यीय खंडपीठानं तीव्र नाराजी व्यक्त केली होती.

दरम्यान, एकल खंडपीठाला दंड करण्याचा अधिकार नसल्याचा दावा जुही चावलाच्या वकिलांकडून करण्यात आला. तसेच, यासंदर्भात दिल्ली उच्च न्यायालयाच्या दोन सदस्यीय विभागीय खंडपीठासमोर दाद मागण्यात आली. यासंदर्भात आज झालेल्या सुनावणीमध्ये जुही चावलाला मोठा दिलासा देण्यात आला.

जुही चावलाच्या अडचणींमध्ये वाढ; २० लाखांचा दंड वसूल करण्यासाठी DSLSAची दिल्ली उच्च न्यायालयात धाव

सामाजिक कार्य करावं लागणार!

जुही चावलाला ठोठावण्यात आलेली २० लाखांची रक्कम २ लाखांपर्यंत कमी करताना न्यायालयानं दिल्ली स्टेट लीगल सर्व्हिसेस अथॉरिटीच्या विविध उपक्रमांमध्ये सहभागी होऊन सामाजिक कार्य करण्याची अट देखील जुही चावलाला घातली. तसेच, जुही चावलानं ५जी सेवांविरोधात दाखल केलेली याचिका चुकीची आणि पब्लिसिटीसाठी होती, हा संदर्भ देखील न्यायालयानं काढून टाकण्याचे निर्देश दिले आहेत.