“विकी माझ्यापासून लांब…” लग्नानंतर प्रथमच कतरिना कैफने व्यक्त केली खंत

‘पिंकव्हीला’ला दिलेल्या मुलाखतीमध्ये कतरिनाने तिच्या आणि विकीच्या नात्याबद्दल खुलासा केला आहे, शिवाय त्या दोघांविषयी सोशल मीडियावर जी चर्चा सुरू असते त्यावरही तिने कटाक्ष टाकला आहे. लग्नानंतर आयुष्य बरंच बदललं असल्याचं कतरिनाने कबूल केलं आहे, कतरिना म्हणाली, “लग्न हा आयुष्यातील खूप मोठा बदल आहे. तुम्ही एका व्यक्तीबरोबर राहता, तुमचं आयुष्य घालवता, सगळ्या गोष्टी शेयर करता हे फारच सुंदर आहे. कधी तो कामानिमित्त माझ्यापासून लांब असतो, कधी मी तिच्यापासून लांब असते, हे असंच राहणार.”

आणखी वाचा : Photos : केवळ ५ कोटींचे बजेट असलेला ‘तुंबाड’ कसा घडला?

विकी आणि कतरिना दोघे शुटींगमध्ये व्यस्त असल्याने कतरिनाला काय वाटतं तेही तिने या मुलाखतीमध्ये सांगितलं, ती म्हणाली, “आम्ही दोघेही कलाकार आहोत आणि एकाच क्षेत्रात असल्याने घरापेक्षा बाहेर आम्ही जास्त वेळ घालवतो, ठिकठिकाणी फिरतो. त्यामुळे मला विकीबरोबर जास्त वेळ घालवायला मिळत नाही, पण तो खरंच खूप समजूतदार आणि चांगला आहे. माझ्या आयुष्यातील त्याचं स्थान हे खूप महत्त्वाचं आहे.”

कतरिना आणि विकी हे गेल्यावर्षी डिसेंबरमध्ये लग्नबंधनात अडकले, नुकतंच या दोघांनी कॉफी विथ करणमध्ये हजेरी लावली होती. तेव्हाही या दोघांनी त्यांच्या वैवाहिक जीवनाबद्दल भाष्य केलं होतं. कतरिना सध्या तिच्या ‘फोन भूत’ या चित्रपटाच्या प्रमोशनमध्ये व्यस्त आहे. यामध्ये कतरिनाबरोबर सिद्धांत चतुरवेदि आणि इशान खट्टर आपल्याला दिसणार आहेत. याबरोबरच कतरिना सलमानच्या ‘टायगर ३’मध्येही झळकणार आहे.