“बॉलीवूड सोडून जायचं आहे तर जा…”, लक्ष्मण उतेकरांचा रोख अनुराग कश्यपकडे? ‘त्या’ वक्तव्याची होतेय जोरदार चर्चा

लक्ष्मण उतेकर यांनी आजवर अनेक चित्रपटांचं दिग्दर्शन केलं आहे. परंतु, ते खऱ्या अर्थाने प्रसिद्धीझोतात आले ते ‘छावा’ या चित्रपटामुळे. अशातच आता त्यांनी नुकतंच बॉलीवूडमधील एका प्रसिद्ध दिग्दर्शकाबद्दल अप्रत्यक्षपणे वक्तव्य केलं आहे. ‘मामास काउच’ला दिलेल्या मुलाखतीमध्ये त्यांनी अनुराग कश्यप यांचा उल्लेख न करता “माझी बॉलीवूडमध्ये राहण्याची इच्छा नाहीये, मला बॉलीवूड सोडायचं आहे असं काही लोक म्हणतात, यावर तुमचं काय मत आहे”. असं विचारण्यात आलं. यावर लक्ष्मण उतेकर म्हणाले, “जा मग बिनधास्त जा, ज्यांना राहायचं नाही त्यांनी खुशाल जा, कोणी जबरदस्ती करत नाहीये. ही इंडस्ट्री अशी आहे, जिथे तुम्हाला सर्जनशील असावं लागतं. इथे आपली मानसिक आणि शारीरिक स्थिती उत्तम असावी लागते, तरच आपण चांगले चित्रपट बनवू शकतो. पण, जर तुमची इच्छाच नसेल इथे राहण्याची तर तुम्ही चांगले चित्रपट कसे बनवाल.”

लक्ष्मण उतेकर पुढे म्हणाले, “प्रेक्षकांमध्ये त्यांचे चित्रपट स्वीकारण्याची संवेदनशीलता नाही असं बोलणं चुकीचं आहे, तर प्रेक्षकांची पसंती हेरण्याची आणि स्वीकारण्याची त्यांची तयारी नाहीये. पूर्वी चित्रपटांनी १०० कोटींची कमाई करणं मोठी गोष्ट होती, आता ७००-८०० कोटी इतकी कमाई चित्रपटांमुळे होते, मग कोण म्हणतंय की चित्रपट संपत चाललेत. ‘बाहुबली’, ‘पुष्पा’, ‘आर.आर.आर’, ‘छावा’ या चित्रपटांनी ८०० कोटींची वगैरे कमाई केली; मग तुम्ही म्हणूच कसं शकता की चित्रपट मरत आहेत. तुमच्या संवेदनशीलतेत बदल होण्याची गरज आहे. प्रेक्षकांकडे त्यांच्या फोनवर जगातील असंख्य चित्रपट पाहण्याची सोय आहे.”

“प्रेक्षकांनी तुमच्यापेक्षा जास्त प्रगती केलेली आहे, कारण त्यांना माहीत आहे काय पाहायचं आहे आणि काय नाही. प्रत्येक तीन वर्षांनी चित्रपट बदलत आहे. प्रत्येक बाबतीत चित्रपट बदलत आहे. चित्रपट निर्माते म्हणून तुम्हाला स्वत:मध्ये बदल करण्याची गरज आहे, कारण तुम्ही एकाच जागी राहून प्रेक्षकांच्या आवडी-निवडी बदलल्या आहेत असं म्हणू शकत नाही.”