बॉलीवूडमध्ये आमिर खान, हृतिक रोशन, अरबाज खान, सोहेल खान अशा अनेक कलाकारांचे घटस्फोट झाले. यापैकी काहींनी दुसरे लग्न केले, तर काही जण रिलेशनशिपमध्ये आहेत. पण एक बॉलीवूड अभिनेता आहे, ज्याचा ८ वर्षांचा संसार मोडला; पण तो आता त्याच्या एक्स पत्नीलाच डेट करतोय. या अभिनेत्याचं नाव गुलशन देवैया आहे.
गुलशन देवैयाच्या (Gulshan Devaiah Dating Ex Wife after Divorce) एक्स पत्नीचं नाव कॅलिरॉय आहे. ती ग्रीक नागरिक आहे. दोघांनी २०१२ मध्ये लग्न केलं होतं. ८ वर्षांनंतर २०२० मध्ये त्यांचा घटस्फोट झाला. लग्नानंतरही ते चांगले मित्र होते, नंतर त्यांनी नात्याला दुसरी संधी दिली आणि घटस्फोटानंतरही ते एकत्र आहेत.
“ती भारतात फिरायला आली होती, त्यादरम्यान आम्ही भेटलो आणि प्रेमात पडलो. त्यावेळी ती युकेमध्ये राहत होती. ती ग्रीक नागरिक आहे. आम्हाला एकमेकांशी लग्न करायचं होतं, त्यामुळे आम्ही लग्न केलं,” असं गुलशनने सांगितलं.
गुलशनने २०११ मधील ‘शैतान’ सिनेमातून करिअरची सुरुवात केली. ९ वर्षांत त्याने सात चित्रपट केले, पण या काळात त्याचं लग्न व घटस्फोट दोन्ही झाले. विवाहित असताना करिअरमध्ये आलेले चढ-उतार सांभाळणं खूप आव्हानात्मक होतं, असं गुलशन इंडियन एक्सप्रेसला दिलेल्या मुलाखतीत सांगितलं होतं.
प्रेमात असणं पुरेसं नाही
तो म्हणाला, “एका काळानंतर आमचं वैवाहिक जीवन कठीण होत गेलं. आम्ही एकमेकांच्या प्रेमात असणं ही गोष्ट संसार करण्यासाठी पुरेशी नव्हती. लहान लहान गोष्टींसाठी एकमेकांशी बोलायची, चर्चा करायची आमची इच्छा उरली नव्हती. मी अशा क्षेत्रात काम करतोय, जे खूप अस्थिर आणि आपल्या अंदाजापलीकडचे आहे. त्यामुळे मला व्यावसायिक पातळीवर समतोल साधण्यासाठी वैयक्तिक आयुष्यात स्थिरता हवी होती. माझं लग्न, माझं नातं मला ती स्थिरता देऊ शकत नव्हतं, त्यामुळे मी निराश होतो, माझी प्रचंड चिडचिड होत होती.”
पुन्हा लग्न करण्याबद्दल गुलशन म्हणाला…
“कॅलिरॉयच्या पण काही समस्या होत्या. ८ वर्षांच्या वैवाहिक जिवनानंतर एकमेकांसोबतच्या चांगल्या आठवणींसह अयशस्वी लग्न सांभाळण्यापेक्षा वेगळे होऊन एकमेकांपासून ब्रेक घ्यायचं आम्ही ठरवलं. त्यानंतर आम्हाला जाणवलं की आमचं एकमेकांसाठी असलेलं प्रेम आजही आधीसारखंच आहे. त्यानंतर आम्ही मैत्रीपासून पुन्हा सुरुवात केली. नंतर नातं नव्याने सुरू करण्यासाठी दोघांनी प्रयत्न केले. त्या मैत्रीपासून चालू झालेला प्रवास पुन्हा रिलेशनशिपपर्यंत येऊन पोहोचला. सध्या तरी पुन्हा लग्न करण्याबाबत काहीच विचार केलेला नाही,” असं गुलशनने नमूद केला.
घटस्फोटानंतर कॅलिरॉय व त्याने घेतलेल्या एका निर्णयाबाबत गुलशन म्हणाला, ”माझे खूप मित्र-मैत्रिणी घटस्फोटित आहेत, त्यांच्यापैकी अनेकांचं त्यांच्या पूर्वीच्या जोडीदारांशी चांगलं नातं नाही. त्यामुळे मी व कॅलिरॉयने ठरवलं होतं की आपण तसं वागायचं नाही.”
