कपूर घराण्याचा वारसा पुढे नेणारी अन् सध्याच्या काळातील आघाडीची अभिनेत्री करीना कपूर ही कायम चर्चेत असते. इंडस्ट्रीमधील गॉसिप गर्ल अशी ओळख असणारी करीना ही आता लवकरच ओटीटी विश्वात पदार्पण करणार आहे. याआधी आमिर खानबरोबरचच्या 'लाल सिंह चड्ढा' या चित्रपटात करीना झळकली, चित्रपटाला बॉयकॉटचा सामना करावा लागला परंतु करीनाच्या अभिनयाची प्रशंसा झाली. करीनाने नुकतीच 'इंडियन एक्सप्रेस'च्या 'एक्सप्रेस अड्डा'मध्ये हजेरी लावली. या मुलाखतीमध्ये करीनाने चित्रपटक्षेत्रातील तिचा आजवरचा प्रवास अन् तिला आलेले अनुभव याविषयी मनमोकळ्या गप्पा मारल्या आहेत. या मुलाखतीमध्ये करीनाने हिंदी कमर्शियल हिंदी चित्रपटांना मिळणाऱ्या यशाबद्दल भाष्य केलं आहे. आणखी वाचा : तैमुर नाव का ठेवलं? करीना कपूरने प्रथमच मांडली स्वतःची बाजू; ट्रोलर्सला स्पष्ट उत्तर देत म्हणाली… याबरोबरच करीनाने तिच्या आणि सैफ अली खानच्या वयातील अंतरावरही भाष्य केलं आहे.जेव्हा करीनाने सैफशी लग्न केलं त्यावेळीही तिला प्रचंड ट्रोल करण्यात आलं होतं. आपल्याहून १० वर्षांनी मोठा असणाऱ्या सैफबरोबर लग्न करण्याचा निर्णय घेतल्यावर करीनाला खूप लोकांनी वेगवेगळे सल्लेही दिले. आता इतक्या वर्षांनी यासगळ्याकडे नेमकं ती कसं पाहते याबाबत तिने स्पष्टीकरण दिलं आहे. करीना म्हणाली, "मला असं वाटतं की वय ही गोष्ट खरंच इतकी महत्त्वाची नसते. तुम्ही आज सैफकडे पहाल तर तो त्याच्या वयाच्या १८ व्या वर्षी जेवढा हॉट दिसायचा त्याहून जास्त हॉट तो आत्ता दिसतोय. त्याच्या फिटनेसकडे बघून कोणाचाही विश्वास बसणार नाही की तो ५३ वर्षांचा आहे. आत्तासुद्धा तो चाळीशीत आहे असंच वाटतंय अन् तो दिवसेंदिवस आणखीन हॉट होत आहे. त्यामुळे वय ही गोष्ट कधीच इतकी महत्त्वाची नसते, त्याचा एवढा विचार आपण का करायचा. उलट मला आनंद आहे मी त्याच्यापेक्षा १० वर्षं लहान आहे, खरं टेंशन त्याला यायला हवं. आमचे विचार खूप मिळते जुळते आहेत आणि एखाद्या नात्यात हीच गोष्ट सर्वात जास्त महत्त्वाची असते." करीना लवकरच ‘जाने जान’ या चित्रपटातून ओटीटी विश्वात पदार्पण करणार आहे. ‘कहानी’ चित्रपटाचे दिग्दर्शक सुजॉय घोष यांनी या चित्रपटाचे दिग्दर्शन केले आहे. यात करीनाबरोबर विजय वर्मा आणि जयदीप अहलावत मुख्य भूमिकेत दिसणार आहे. करीनाच्या वाढदिवशी म्हणजेच २१ सप्टेंबरला ‘जाने जान’ हा चित्रपट नेटफ्लिक्स या ओटीटी प्लॅटफॉर्मवर प्रदर्शित होणार आहे.
