झगमगत्या विश्वात काम करण्याची अनेकांची इच्छा असते. पण, ग्लॅमरच्या या विश्वात अनेकदा नको त्या गोष्टीदेखील घडत असतात. अभिनय क्षेत्रात काम केल्यामुळे प्रसिद्धी, लोकप्रियता तर मिळतेच, पण त्यासाठी काही कलाकारांना वाईट प्रसंगांचा सामना करावा लागतो. अशातच एका मराठी अभिनेत्रीने ती अवघ्या चार वर्षांची असताना दिग्दर्शकाने तिला थोबाडीत मारल्याचा प्रसंग शेअर केला आहे.
अभिनेत्री पल्लवी जोशी या गेली अनेक दशकं मनोरंजन क्षेत्रात कार्यरत आहेत. मराठीसह हिंदी सिनेविश्वातही त्यांनी अभिनय केला आहे. त्यावेळी केवळ चार वर्षांची असताना त्यांनी ‘नाग मेरे साथी’ (१९७३) या चित्रपटातून अभिनय क्षेत्रात पदार्पण केलं. त्या वयातसुद्धा त्यांना अभिनयाची फारशी इच्छा नव्हती, पण त्यांच्या भावाशी म्हणजेच अभिनेते अलंकार जोशी यांच्याबरोबरच्या स्पर्धेमुळे त्यांनी या क्षेत्रात काम करण्यास होकार दिला.
अशातच नुकत्याच एका मुलाखतीत या चित्रपटादरम्यान दिग्दर्शकाने त्यांना थोबाडीत मारल्याचा प्रसंग सांगितला आहे. याबद्दल पल्लवी म्हणतात, “त्या काळात शांतीलाल सोनी नावाचे एक दिग्दर्शक होते, ते माझ्या वडिलांचे खूप जवळचे मित्र होते. सचिन पिळगांवकर आणि सारिका यांच्या प्रमुख भूमिका असलेल्या ‘रक्षाबंधन’ या चित्रपटात मला सारिकाच्या बालपणीच्या भूमिकेसाठी घेतलं होतं.”
यापुढे त्या म्हणतात, “तेव्हा एका गाण्याचं शूट होतं, ज्यात मला रडायचं होतं. पण, मी तेव्हा फक्त चार वर्षांची होते. मला ते सगळं खूप मजेशीर वाटत होतं. त्यांनी अनेक टेक घेतले; तरी मी हसतच राहिले. शेवटी वैतागून शांतीलाल सोनींनी माझ्या वडिलांना माझ्या थोबाडीत मारायला सांगितलं. पण, बाबांनी नकार दिला आणि फक्त रागावल्यासारखं केलं, पण त्यामुळे मला आणखीनच हसू आलं. शेवटी दिग्दर्शक स्वतः पुढे आला आणि त्याने माझ्या थोबाडीत मारली.”
यापुढे त्या सांगतात, “तेव्हा कॅमेरा चालू होता आणि दिग्दर्शकाने मला सर्वांसमोर मारल्यामुळे माझा अहंकार दुखावला, कारण मला याआधी कोणीही मारलं नव्हतं. सीन संपल्यानंतर मी उठून जोरात ओरडले आणि ‘मला हा चित्रपट करायचा नाही’ असं म्हणाले. शेवटी शूटिंग थांबवलं गेलं. त्यावेळी आधी मी काम करणार नाही, यावर ठाम होते. मग दोन दिवसांनंतर मी थोडी शांत झाले आणि पुन्हा शूटिंग सुरू झालं.”
पल्लवी जोशी यांनी लग्न झाल्यानंतर काही वर्षे अभिनयापासून ब्रेक घेतला होता. ब्रेकनंतर त्या ‘द काश्मीर फाइल्स’, ‘द व्हॅक्सीन वॉर’ या चित्रपटांत दिसल्या. तसंच अनुपम खेर यांच्या ‘तन्वी द ग्रेट’ या नुकत्याच आलेल्या चित्रपटातही त्यांनी महत्त्वाची भूमिका साकारली आहे.
