“यांना परमेश्वरही…” मराठा मंदिर चित्रपटगृहाचे मालक मनोज देसाई ‘आदिपुरुष’च्या निर्मात्यांवर संतापले

चित्रपटातील संवाद बदलल्यावरही त्याचा काहीही परिणाम झालेला नाही, लोकांनी या चित्रपटाकडे पाठ फिरवली आहे. बऱ्याच कलाकारांनीही या चित्रपटावर टीका केली आहे. अशातच मुंबईचं मराठा मंदिर आणि गेटी गॅलक्सि या दोन्ही चित्रपटगृहांचे मालक मनोज देसाई यांनीही त्यांची नाराजी व्यक्त केली आहे. चित्रपटात वापरली गेलेली भाषा अन् एकूणच आराध्य दैवातांचं अपमानजनक सादरीकरण पाहता निर्मात्यांनी माफी मागायला हवी असं मनोज देसाई यांनी म्हंटलं आहे.

आणखी वाचा : ‘आदिपुरुष’ तर आपटला, पण प्रभासचा ‘सलार’ कमावणार पहिल्याच दिवशी ‘इतके’ कोटी; वाचा ट्रेड एक्स्पर्ट्सचं मत

एका यूट्यूब चॅनल ‘फिल्मी फिवर’ला दिलेल्या मुलाखतीमध्ये मनोज देसाई म्हणाले, “या निर्मात्यांनी इतका टुकार चित्रपट सादर केला आहे की प्रेक्षक यांना कदापि माफ करणार नाहीत, प्रेक्षकच काय तर यांना खुद्द परमेश्वरही माफ करणार नाही.” ओम राऊतने एक जागा हनुमानासाठी राखीव ठेवण्याची विनंती केली त्यावर मनोज देसाई म्हणाले, “एक काय संपूर्ण चित्रपटगृह रिकामं आहे. निर्मात्यांनी प्रेक्षकांच्या भावनांशी खेळायला नको होतं, बरेच मुस्लिम प्रेक्षकही याविषयी खेद व्यक्त करत आहेत.”

दरम्यान बॉक्स ऑफिसवरही ‘आदिपुरुष’ची हवा कमी होताना दिसत आहे. पहिले तीन दिवस सोडले तर सोमवारपासून चित्रपटाच्या कमाईमध्ये घटच होताना दिसत आहे. चित्रटपटाने आठव्या दिवशी अवघ्या साडेतीन कोटींचा गल्ला जमवला तर भारतात आतापर्यंत २६३.४० कोटी रुपये कमावले आहेत. आज आणि उद्या रविवारी वीकेंडमुळे याच्या कलेक्शनमध्ये वाढ होते की नाही ते पाहणं महत्त्वाचं ठरेल.