“फ्लॉप अमिताभ बच्चनला चित्रपटात घेऊ नका”, भर पार्टीत बिग बींबद्दल कोण असं म्हणालेलं?

“आम्ही सीता और गीता (१९७२) हा सिनेमा हिट ठरल्याने घरी सक्सेस पार्टी करत होतो, त्या पार्टीला बरेच लोक आले होते. ते कुजबुजत होते आणि मला सल्ला देत होते की त्याला (अमिताभ बच्चन) घेऊ नका कारण, त्याआधी त्याचे अनेक फ्लॉप चित्रपट झाले होते. ते मला म्हणाले, ‘अशी चूक करू नकोस!’ अशी आठवणी सिप्पी यांनी सांगितली. सल्ला देणारे लोक हे बॉक्स ऑफिसचे जाणकार होते आणि त्यांना चित्रपट कशी कामगिरी करेल, याबद्दल काळजी वाटत होती, असंही सिप्पी यांनी नमूद केलं.

“पण त्यांच्यात (अमिताभ बच्चनमध्ये) काहीतरी असं होतं जे मला चांगलं वाटलं होतं. त्यांचे काही चांगले चित्रपट होते, पण ते चालले नव्हते. १९७१ साली आलेल्या आनंदमध्ये राजेश खन्नांची भूमिका खूपच भावनिक होती आणि अमिताभ एका शांत व्यक्तीच्या भूमिकेत होते. पण जर त्या दोघांपैकी कोणीही एक त्या सिनेमात नसतं, तर तो चित्रपट चालला नसता असं मला वाटतं,” असं झूमशी बोलताना सिप्पी म्हणाले.

सिप्पी यांनी अमिताभ बच्चन यांचं कौतुक केलं. चित्रपटासाठी जे काही करायला सांगितलं, ते त्यांनी योग्य केलं असं ते म्हणाले. “त्या काळात आणखी एक चित्रपट आला होता, बॉम्बे टू गोवा (१९७२) या सिनेमात त्यांनी बसमध्ये एक गाणं गायलं होतं जे खूप चांगलं होतं. इतकी उंची असूनही त्यांच्या शरीराची हालचाल लयबद्ध होती,” अशी आठवण सिप्पी यांनी सांगितली.

“म्हणून जेव्हा मी हे दोन परस्परविरोधी पात्र आणि चित्रपट पाहिले तेव्हा मला वाटलं की या व्यक्तीत ही क्षमता आहे. तसेच माझ्याकडे सिनेमात आधीच अनेक यशस्वी स्टार होते, जसे की धर्मेंद्र जी (जय), संजीव कुमार (ठाकूर म्हणून), हेमा मालिनी (बसंती) आणि जया भादुरी (राधा). त्यामुळे मला त्यांना एक संधी द्यायची होती आणि माझा तो निर्णय योग्य ठरला,” असं सिप्पी पुढे म्हणाले. अशा रितीने अमिताभ यांची शोलेमध्ये वर्णी लागली. चित्रपट हिट ठरला आणि त्यानंतर अमिताभ बच्चन यांनी अनेक सुपरहिट सिनेमे केले.