Riteish Deshmukh Birthday Celebration : बॉलीवूडसह मराठी कलाविश्व गाजवणारा तसेच विविधांगी भूमिका साकारून प्रेक्षकांना ‘वेड’ लावणारा मराठमोळा अभिनेता म्हणून रितेश देशमुखला ओळखलं जातं. २००३ मध्ये प्रदर्शित झालेल्या ‘तुझे मेरी कसम’ या चित्रपटातून त्याने मनोरंजनविश्वात पदार्पण केलं. अल्पावधीतच रितेशचा हटके अंदाज प्रेक्षकांना भावला आणि घराघरांत त्याची एक वेगळी ओळख निर्माण झाली. अभिनेत्याने १७ डिसेंबरला त्याचा ४६ वा वाढदिवस साजरा केला. यानिमित्ताने संपूर्ण कलाविश्वातून त्याच्यावर शुभेच्छांचा वर्षाव करण्यात आला आहे. याशिवाय त्याच्या कुटुंबीयांनी देखील रितेशसाठी खास Surprise प्लॅन केलं होतं.
रितेशने त्याचा वाढदिवस जवळचे काही मित्रमंडळी आणि कुटुंबीयांबरोबर साजरा केला. अभिनेत्याच्या दोन्ही मुलांनी लाडक्या बाबाच्या वाढदिवसानिमित्त खास प्लॅनिंग केलं होतं. याचा फोटो सध्या सर्वत्र व्हायरल होत आहे. रियान आणि राहीलने बाबासाठी नेमकं काय केलंय पाहुयात…
रितेश देशमुखच्या ( Riteish Deshmukh ) वाढदिवसानिमित्त त्याच्या दोन्ही मुलांनी एक खास गोष्ट केली आहे. याचा फोटो अभिनेत्याने स्वत: त्याच्या इन्स्टाग्राम स्टोरीवर शेअर केला आहे. रितेश आपल्या वाढदिवसानिमित्त जिनिलीया आणि दोन्ही मुलांसह एका रेस्टॉरंटमध्ये जेवायला गेला होता. यावेळी बाबाच्या वाढदिवसासाठी त्याच्या मुलांनी जेवणाचा मेन्यू ठरवला होता.
“डिअर बाबा, वाढदिवसाच्या खूप शुभेच्छा…आमचं तुझ्यावर खूप प्रेम आहे. -रियान, राहील, फ्लॅश ( श्वानाचं नाव )” असा गोड मेसेज लिहून त्याखाली या मुलांनी मेन्यूमध्ये स्टार्टर, मेन कोर्स, डेसर्टसाठी काय-काय ठरवलंय याची नावं पाहायला मिळत आहेत.
रितेश देशमुखला वाढदिवसानिमित्त जिनिलीयाने देखील रोमँटिक पोस्ट शेअर करत शुभेच्छा दिल्या होत्या. “जर तुम्ही उत्कृष्ट मुलगा, खूप चांगला बाबा, best भाऊ, best नवरा म्हणून कोणाकडे पाहत असाल तर तो रितेश आहे आणि तो आधीच पूर्णपणे माझा आहे” असं जिनिलीयाने तिच्या पोस्टमध्ये म्हटलं होतं. दरम्यान, अभिनेत्याच्या ( Riteish Deshmukh ) आगामी कामाबद्दल सांगायचं झालं, तर तो येत्या वर्षात ‘हाऊसफुल्ल ५’ आणि ‘मस्ती ४’ चित्रपटांमधून प्रेक्षकांच्या भेटीला येणार आहे.
