“करिअरमधील सर्वात लहान प्रकरण”, समीर वानखेडेंचे आर्यन खानबद्दल वक्तव्य; शाहरुखच्या डायलॉगबद्दल म्हणाले, “थर्ड क्लास…”

आर्यन खानच्या अटक प्रकरणात समीर वानखेडे यांच्यावर आरोप झाले होते. आता एका मुलाखतीत त्यांना या प्रकरणाशी संबंधित काही प्रश्न विचारण्यात आले, त्याची त्यांनी उत्तरं दिली. गौरव ठाकूरशी बोलताना फक्त सेलिब्रिटींनाच टार्गेट केल्याच्या टीकेवर समीर वानखेडेंनी प्रतिक्रिया दिली. “माझा वैयक्तिक आणि व्यावसायिक आयुष्यात ‘सेलिब्रिटी’ या शब्दावर विश्वास नाही. मी फक्त ‘सो कॉल्ड सेलिब्रिटीज’ना पकडतो, असं लोकांना वाटतं; पण तसं नाही. इतरही ३४०० प्रकरणं मी हाताळली आहेत. पण ती लाइमलाइटमध्ये येत नाही, कारण ते लोक बातम्यांमध्ये झळकणारे नाहीत. मी फक्त माझे काम केले. लोक फक्त काही ठराविक लोकांबद्दलच लिहित असतील, तर त्यात माझी चूक नाही,” असं समीर वानखेडे म्हणाले.

हेही वाचा – नेटफ्लिक्सवर या आठवड्यात सर्वाधिक पाहिल्या गेलेल्या सिनेमांची यादी; १० पैकी ७ भारतीय चित्रपट तुम्ही पाहिलेत का?

मला भीती वाटत नाही – समीर वानखेडे

शाहरुख खान प्रकरणाबाबत बोलताना समीर म्हणाले, “हे प्रकरण माझ्या करिअरमधील सर्वात लहान प्रकरणांपैकी एक आहे. मला याला इतकं महत्त्व द्यायचं नाही तसेच त्याबद्दल बोलण्यात माझा वेळ वाया घालवायचा नाही. हे प्रकरण सध्या न्यायालयात आहे आणि मला त्यावर भाष्य करायचे नाही. मला एवढंच सांगायचं आहे की, मला कशाचीही भीती वाटत नाही आणि मी काहीही लपवत नाही. मी याबद्दल बोलणं टाळतो आणि त्यामागचं एकमेव कारण म्हणजे मी या खटल्याबद्दल बोलणार नसल्याचे प्रतिज्ञापत्र न्यायालयात दिले आहे. बोलायला आणि शेअर करायला खूप काही आहे, पण मी बोलू शकत नाही. एकदा कोर्टाने निर्णय दिला की, मी त्याबद्दल सविस्तर बोलेन.”

हेही वाचा – वर्षभरापूर्वी लग्नगाठ बांधणारी मराठी अभिनेत्री झाली आई, लेकीचं नाव ठेवलं ‘अहना’; नामकरण सोहळ्याचा व्हिडीओ चर्चेत

२०२१ मध्ये ही घटना घडली आणि २०२२ मध्ये आर्यन खानला या प्रकरणात क्लीन चिट मिळाली. त्यानंतर शाहरुख खानने २०२३ मध्ये ‘पठाण’ आणि ‘जवान’ या दोन मोठ्या चित्रपटांमध्ये काम केलं. त्यापैकी ‘जवान’चा एक डायलॉग खूप गाजला होता. हा डायलॉग समीर वानखेडेंसाठी शाहरुखने म्हटल्याची प्रचंड चर्चा झाली होती. ‘बेटे को हाथ लगाने से पहले बाप से बात कर’ असा तो डायलॉग होता.

हेही वाचा – Photos: स्पीडबोटच्या धडकेनंतर बुडाली ‘नीलकमल’ बोट, समुद्रातील धक्कादायक फोटो आले समोर

अत्यंत हीन व थर्ड क्लास संवाद – समीर वानखेडे

शाहरुखच्या काही चॅट्स ऑनलाइन लीक झाल्याच्या बातम्याही तेव्हा आल्या होत्या. ज्यात तो कथितपणे आपल्या मुलाविरुद्धातील तक्रार रद्द करण्याची विनंती करत होता. यावर समीर उत्तर देत म्हणाले, “मला नावं घेऊन त्यांना जास्त प्रसिद्धी द्यायची नाही. लीक झालेल्या चॅट्सबद्दल बोलायचं झाल्यास मी स्वतः पुन्हा एकदा हेच म्हणेन की मला त्यावर बोलण्याची परवानगी नाही. बाप, बेटा असे शब्द वापरून जे डॉयलॉग माझ्याबद्दल म्हटले गेले ते अत्यंत हीन व थर्ड क्लास होते. सुसंस्कृत समाजात आपण असे शब्द वापरत नाही. हे फक्त रस्त्यावरचे फालतू डॉयलॉग आहेत. मी अशा गोष्टींना महत्त्व देऊन त्यावर बोलणं योग्य समजत नाही.”