शाहरुखच्या ‘जवान’चा ‘गोरखपुर रुग्णालय दुर्घटने’शी नेमका संबंध कसा? जाणून घ्या ‘या’ दाहक वास्तवाबद्दल

जर तुम्ही शाहरुख खानचा ‘जवान’ पाहिला असेल, तर डॉ. इरम खानची व्यक्तिरेखा पाहून तुम्हाला २०१७ च्या गोरखपूर रुग्णालयातील दुर्घटनेची आठवण नक्की होईल ज्यामध्ये ऑक्सिजनच्या कमतरतेमुळे ६३ लहान मुलांचा मृत्यू झाला होता. या भीषण अपघातात डॉ. कफील खान यांना वैद्यकीय निष्काळजीपणाच्या आरोपाखाली अटक करण्यात आली होती. ‘जवान’मध्ये गोरखपूर हॉस्पिटलसारखाच अपघात दाखवल्यानंतर बरीच लोक डॉ. कफील खान यांना टॅग करून चित्रपट पाहण्याचा सल्ला देत आहेत.

आणखी वाचा : ‘जीस्म’साठी बिपाशा नव्हे तर सनी लिओनी होती पहिली पसंती; पूजा भट्टने सांगितला ‘तो’ किस्सा

नुकतंच डॉ. कफील खान यांनी याबाबत एक व्हिडीओ शेअर करत ट्वीट केलं आहे. या ट्वीटमध्ये ते म्हणतात, “मी जवान अजून पाहिलेला नाही, पण बऱ्याच लोकांना चित्रपट पाहून माझी आठवण झाल्याची बातमी माझ्यापर्यंत पोहोचली. फिल्मी विश्व आणि खरं आयुष्य यात बराच फरक असतो. जवान चित्रपटात आरोग्यमंत्री आणि इतर काही लोकांना शिक्षा होते, पण खऱ्या आयुष्यात मला आणि माझ्याबरोबर ८१ कुटुंबांना आजही न्याय मिळालेला नाही. शाहरुख खान आणि अॅटली या दोघांचे मी आभार मानतो की त्यांनी चित्रपटाच्या माध्यमातून हा मुद्दा उचलून धरला आहे.”

काय आहे गोरखपुर रुग्णालय दुर्घटना?

डॉ. कफील हे बाबा राघव दास (BRD) मेडिकल कॉलेज, गोरखपूरचे डॉक्टर आणि माजी व्याख्याते आहेत. थकबाकी न भरल्याने शासकीय रुग्णालयाचा ऑक्सिजन पुरवठा खंडित झाल्याचे समजताच त्यांनी ही बाब अधिकाऱ्यांच्या निदर्शनास आणून देण्याचा प्रयत्न केला होता. पण त्यांच्या या मागणीकडे केवळ दुर्लक्ष करण्यात आले होते. तेव्हा त्यांनी स्वखर्चाने ऑक्सिजन सिलेंडरची सोय केली होती, पण तरी यादरम्यान ६३ मुलांचा तीव्र एन्सेफलायटीस सिंड्रोममुळे मृत्यू झाला होता.

उत्तर प्रदेश सरकारने ऑक्सिजन पुरवठ्याची कमतरता हे कारण नाकारले आणि त्याऐवजी कफील यांनाच निष्काळजीपणाच्या आरोपाखाली तुरुंगात पाठवले. अगदी चित्रपटातही हीच गोष्ट दाखवण्यात आली आहे. चित्रपटात डॉ. कफील यांच्याशी मिळती-जुळती भूमिका अभिनेत्री सान्या मल्होत्राने साकारली आहे. ‘जवान’मध्ये दाखवलेल्या या सीनमुळे गोरखपुरची ही दुर्घटना पुन्हा चर्चेत आली आहे.