“शक्तिमानची पॅन्ट फाटल्यामुळे…” सिद्धांत चतुर्वेदीचा ‘फोन भूत’च्या प्रमोशनदरम्यानचा ‘तो’ व्हिडीओ व्हायरल

सिद्धांत चतुर्वेदी सोशल मीडियावर फार सक्रिय आहे. तो चाहत्यांना या माध्यमाद्वारे त्याच्या आयुष्यातील अपडेट्स देत असतो. नुकताच त्याने एक व्हिडीओ इन्स्टाग्रामवर शेअर केला आहे. या व्हिडीओमध्ये त्याने नव्वदच्या दशकामध्ये प्रसिद्ध असलेल्या ‘शक्तिमान’ या भारतीय सुपरहिरोचा वेश केला आहे. सूट-कोट, चष्मा, हातामध्ये सूटकेस बॅग अशा गंगाधरच्या अवतारामध्ये तो कॅमेऱ्यासमोर येतो. काही सेकंदानंतर तो हातामध्ये असलेली बॅग आणि डोळ्यावरील चष्मा फेकून हात वर करुन पोझ देतो आणि त्यानंतर लगेच तो शक्तिमानच्या कपड्यांमध्ये दिसतो.

आणखी वाचा – “आम्ही वाटलेली तिकीटं दारूसाठी…” ‘कांतारा’ स्टार रिषभ शेट्टीने सांगितली स्ट्रगलच्या काळातील ‘ती’ आठवण

या ट्रान्सफॉरमेशननंतर त्याच्या चित्रीकरणामधले काही सीन्स पाहायला मिळतात. तेव्हा तो बघू नकोस, ‘पॅन्ट फाटली आहे’, असं म्हणत हातामधली फाटलेली पॅन्ट दाखवतो. पुढे कॅमेरा जवळ येत असल्याचे लक्षात आल्याने तो “तू बीटीएस काय घेत आहेस शक्तिमानची पॅन्ट फाटली, त्यामुळे मला मध्येच गंगाधर बनावं लागतं आहे”, असे म्हणतो. ‘सॉरी शक्तिमान’ असे कॅप्शन त्याने या व्हिडीओला दिले आहे.

आणखी वाचा – ‘पठाण’च्या टीझरसाठी चाहते उत्सुक; दीपिका आणि शाहरुखचे नवे फोटो व्हायरल

त्याने हा व्हिडीओ ‘फोन भूत’च्या प्रमोशनसाठी केला असल्याचा अंदाज लावला जात आहे. सिद्धांतसह या चित्रपटामधील अन्य दोन प्रमुख कलाकारांनीही सुपरहिरो गेटअप केल्याचे पाहायला मिळत आहे. कतरिनाने ‘सुसाइड स्क्वॉड’ (Suicide Squad)मधील ‘हार्ली क्विन’चा, तर ईशान खट्टरने ‘चार्ली अ‍ॅण्ड चॉकलेट फॅक्टरी’ (Charlie and the Chocolate Factory) चित्रपटातील विली वोंका या पात्राचा वेष साकारला आहे.