२०२३ हे वर्षं जसं शाहरुख खानसाठी जितकं महत्त्वाचं होतं तितकंच देओल परिवारासाठीही महत्त्वाचं होतं. नुकताच बॉबी देओलची छोटीशी पण महत्त्वाची भूमिका असलेला 'अ‍ॅनिमल' बॉक्स ऑफिसवर यशस्वी ठरला. याआधी धर्मेंद्र यांनी 'रॉकी और रानी की प्रेम कहानी'मध्ये महत्त्वाची भूमिका निभावली. त्यांच्याही आधी सनी देओलने 'गदर २'मधून बॉक्स ऑफिसवर कल्ला केला. खऱ्या अर्थाने सनी देओलने 'गदर २' पासून बाजी मारायला सुरुवात केली, पण आता मात्र सनी देओल हरवल्याची चर्चा होताना दिसत आहे. आणखी वाचा : 'अ‍ॅनिमल'प्रमाणेच प्रभासच्या 'सालार'वरही चालली सेन्सॉरची कात्री; चित्रपटाला मिळालं 'A' सर्टिफिकेट काही दिवसांपूर्वी रस्त्यावर दारू पिऊन झिंगत चालत असल्याचा सनीचा व्हिडीओ व्हायरल झाला होता, परंतु तो खरा नसून चित्रपटातील एक सीन असल्याचं त्याने स्पष्ट केलं. आता सनी हरवला असल्याची पोस्टर्स सोशल मीडियावर झळकू लागली आहेत ज्यामुळे सोशल मीडियावर पुन्हा चर्चा रंगली आहे. इतकंच नव्हे तर ही पोस्टर्स सनीच्या मतदारसंघात पाहायला मिळाली आहेत. सनी जेवढा बॉलिवूडमध्ये लोकप्रिय आहे तितकीच मतदार संघात त्याच्यावर टीका होताना पाहायला मिळते. सनी देओल हा गुरुदासपूर मतदार संघातून खासदार आहे. निवडणूका झाल्यापासून सनी त्याच्या मतदार संघात फिरकलाही नसल्याची तक्रार तिथल्या कार्यकर्त्यांनी केली आहे. "आमचे खासदार हरवले आहेत, त्यांना शोधून देणाऱ्यास ५० हजारांचे बक्षीसही देण्यात येईल" अशा आशयाची पोस्टर्स गुरुदासपूरमध्ये पाहायला मिळत आहेत. या फोटोवर लोकांनीही भन्नाट कॉमेंट केल्या आहेत. याआधीही मतदार संघाकडे कानाडोळा केल्याने सनीवर टीका झाल्याचं समोर आलं आहे. गुरुदारपूर-पठाणकोटमधील एका बसस्टँडवर सनी देओल बेपत्ता असल्याची ही पोस्टर्स झळकली आहेत. इतकंच नव्हे तर प्रवाशांनादेखील ही पोस्टर्स वाटली आहेत. 'गदर २'च्या घवघवीत यशानंतर सनी देओलची क्रेझ पुन्हा वाढली आहे. सनी लवकरच आता राजकुमार संतोषी यांच्याबरोबर चित्रपटात काम करणार आहे, शिवाय या चित्रपटात सनीसह आमिर खानही दिसणार असल्याची चर्चा आहे.
