Latest Marathi News- Breaking News Today | Read Marathi Batmya from Maharashtra, India ब्रेकींग मराठी न्यूज at https://loksatta.com/

भारत आणि बॉलिवूडविषयी देशभक्त 'रईस'च्या पाकिस्तानी अभिनेत्री माहिराचे विचार..

माहिरा खान

उरी हल्ल्यानंतर भारत आणि पाकिस्तान या दोन्ही राष्ट्रांमध्ये तणावाचे वातावरण काही कमी होण्याचे नावच घेत नाहीये. उरी हल्ल्यानंतर भारतामध्ये पाकिस्तानी कलाकारांना मोठ्या प्रमाणात विरोध करण्यात येत आहे. ‘ऐ दिल है मुश्किल’ या चित्रपटाच्या वेळी पाकिस्तानी कलाकारांना होणाऱ्या विरोधाचा अंदाज अनेकांना आला असेलच. या चित्रपटाव्यतिरिक्त अनेकांनी अभिनेता शाहरुख खानच्या आगामी ‘रईस’ या चित्रपटाच्या विरोधातही नाराजीचा सूर लावला होता. पण, राज ठाकरे यांची भेट घेत शाहरुख खानने संभाव्य अडचणी चित्रपटाच्या प्रदर्शनाधीच दूर करत त्याची महत्त्वाची भूमिका पार पाडली. पण, आता एका वेगळ्याच मार्गाने शाहरुखचा हा आगामी चित्रपट आणि त्यातील मुख्य पाकिस्तानी अभिनेत्री माहिरा खान पुन्हा एकदा वादाच्या भोवऱ्यात अडकण्याची शक्यता आहे.

‘रईस’ या चित्रपटामध्ये माहिरा सुद्धा मुख्य भूमिकेत दिसणार असून चित्रपटाच्या ट्रेलरमध्येही ती बऱ्याच वेळासाठी दिसत आहे. पण, सोशल मीडियावर नुकत्याच व्हायरल झालेल्या एका व्हिडिओतील माहिराचे वक्तव्य ऐकले तर अनेकांच्याच मनात पुन्हा एकदा तिच्याविषयी संताप जागा होऊ शकतो. ‘रईस’ हा चित्रपट चर्चेत आल्यामुळे सध्या सोशल मीडियावरही माहिराविषयीच्या गोष्टी जाणून घेण्यासाठी अनेकजण उत्सुक असल्याचे दिसते.

ट्विटरवर सध्या माहिराचा २०११ साली प्रदर्शित झालेल्या एका कार्यक्रमातील व्हिडिओ व्हायरल करण्यात आला आहे. पाकिस्तानी विनोदवीर ओमर शरीफच्या चॅट शो दरम्यान माहिरा असे म्हणताना दिसतेय की, ‘तुम्ही भारतापासून कधीच प्रोत्साहित होऊ नका. आपण बॉलीवूडमधील नाही आहोत’. माहिराच्या या वक्तव्यामुळे आता पुन्हा एकदा संभ्रमाचे वातावरण निर्माण झाले आहे. ट्विटरद्वारे शेअर करण्यात आलेल्या या व्हिडिओला अनेकांनी रिट्विट केले आहे. तर त्याविषयी अनेकजण त्यांच्या संतप्त प्रतिक्रिया देत आहेत.

https://twitter.com/AsYouNotWish/status/814563419311448064

सोनम महाजनच्या अकाऊंटद्वारे ट्विट करण्यात आलेल्या या व्हिडिओसह असेही लिहिण्यात आले आहे की, ‘भारत आणि बॉलिवूडविषयी देशभक्त ‘रईस’च्या पाकिस्तानी अभिनेत्री माहिराचे विचार.. कृपया आपला आत्मसन्मान विसरूनच हा चित्रपट पाहायला जा’. माहिराच्या या व्हायरल व्हिडिओमुळे आता पुन्हा एकदा ‘रईस’ विरोधी वातावरणाला हवा मिळणार का हे लवकरच कळेल.

First published on: 30-12-2016 at 16:20 IST

मराठीतील सर्व मनोरंजन बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Mahira khan taking dig on india and bollywood video is going viral these days

VIDEO: भारतापासून अजिबात प्रेरित होऊ नका; ‘देशभक्त’ पाकिस्तानी अभिनेत्रीने तोडले ‘तारे’

भारत आणि बॉलिवूडविषयी देशभक्त 'रईस'च्या पाकिस्तानी अभिनेत्री माहिराचे विचार..