महाराष्ट्राचा लाडका दगडू अर्थात अभिनेता प्रथमेश परब सोशल मीडियावर खूप सक्रिय असतो. नेहमी आपल्या व्यावसायिक आणि वैयक्तिक आयुष्याविषयी पोस्ट शेअर करत असतो. काही दिवसांपूर्वीय अक्षय्य तृतीयेच्या मुहूर्तावर त्याने चाहत्यांना आनंदाची बातमी दिली. आपल्या आगामी चित्रपटाची पोस्ट त्याने शेअर केली. ‘मुंबई लोकल’ असं प्रथमेशच्या आगामी चित्रपटाचं नाव असून अक्षय्य तृतीतयेला या चित्रपटाचा पोस्टर सिद्धिविनायकाचे आशीर्वाद घेऊन प्रदर्शित करण्यात आला. या चित्रपटात प्रथमेशसह अभिनेत्री ज्ञानदा रामतीर्थकर, अभिनेता पृथ्वीक प्रताप, मनमीत पेम झळकणार आहेत. अशातच सध्या प्रथमेशचा ज्येष्ठ अभिनेत्री किशोरी शहाणेंबरोबरचा मजेशीर व्हिडीओ व्हायरल झाला आहे.
अभिनेता प्रथमेश परबने किशोरी शहाणेंबरोबरचा व्हिडीओ इन्स्टाग्रामवर शेअर केला आहे. “Masti in-between वेगवेगळे shoots and वेगवेगळे sets…PS- अजिबात आळस न करता मनापासून केलेली Reel”, असं कॅप्शन लिहित प्रथमेशने व्हिडीओ शेअर केला आहे. या व्हिडीओमध्ये सध्या सोशल मीडियावर व्हायरल होतं असलेलं ‘भाडीपा’चं गाणं ‘माझ्या नीट बोलायचं’ यावर प्रथमेश व किशोर शहाणे अभिनय करताना दिसत आहेत. दोघांचा हा व्हिडीओ चांगलाच चर्चेत आला आहे.
प्रथमेश व किशोरी शहाणेंच्या या व्हिडीओवर अनेक नेटकऱ्यांनी भरभरून प्रतिक्रिया दिल्या आहेत. “सुंदर”, “अरे व्वा”, “मस्त”, “किशोरी शहाणे तुम्ही खूप गोड आहात”, अशा प्रतिक्रिया करत हार्ट इमोजी नेटकऱ्यांनी या व्हिडीओवर शेअर केले आहेत.
दरम्यान, किशोरी शहाणेच्या कामाबद्दल बोलायचं झालं तर, त्या सध्या हिंदी मालिकेत काम करत आहेत. ‘झी टीव्ही’वरील ‘कैसे मुझे तुम मिल गई’ या हिंदी मालिकेत त्या महत्त्वाच्या भूमिकेत पाहायला मिळत आहेत. तसंच प्रथमेशच्या कामाबद्दल बोलायचं झालं तर, लवकरच त्याचा ‘होय महाराजा’ चित्रपट प्रेक्षकांच्या भेटीस येत आहे. ३१ मेला प्रदर्शित होणाऱ्या या चित्रपटात अभिनेता संदीप पाठक, अभिजीत चव्हाण, अंकिता लांडे, असे बरेच कलाकार मंडळी झळकणार आहेत. या चित्रपटातील गाणी सध्या प्रदर्शित होतं आहेत. याशिवाय ‘ताजा खबर’ वेब सीरिजच्या दुसऱ्या सीझनमध्ये प्रथमेश पाहायला मिळणार आहे. अभिनेता भुवन बाम, श्रिया पिळगांवकर, महेश मांजरेकर अशा अनेक कलाकारांबरोबर प्रथमेशने ‘ताजा खबर सीझन २’मध्ये काम केलं आहे.
