‘महाराष्ट्राची हास्यजत्रा’ या लोकप्रिय कार्यक्रमातून घराघरात पोहोचलेली शिवाली परब आता विविधांगी भूमिकेत पाहायला मिळत आहे. कधी चित्रपटात, तर कधी अल्बम साँगमध्ये शिवाली दिसत आहे. काही आठवड्यांआधी तिचा ‘पाणीपुरी’ नावाचा चित्रपट प्रेक्षकांच्या भेटीस आला होता. या चित्रपटात शिवालीसह मकरंद देशपांडे, विशाखा सुभेदार, कैलाश वाघमारे अशी तगडी कलाकार मंडळी होती. त्यानंतर आता शिवाली एका वेगळ्या भूमिकेत मोठ्या पडद्यावर झळकणार आहे.
सत्य घटनेवर आधारित असलेल्या ‘मंगला’ चित्रपटात सुप्रसिद्ध गायिकेचा जीवनप्रवास पाहायला मिळणार आहे. याच चित्रपटात शिवाली परब चेहऱ्यावर अ‍ॅसिड हल्ला झालेल्या मंगलाच्या भूमिकेत झळकणार आहे. १७ जानेवारी २०२५ रोजी ‘मंगला’ चित्रपट प्रदर्शित होणार आहे. नुकताच या चित्रपटाचा टीझर आणि म्युझिक लाँच सोहळा पार पडला. यावेळी ज्येष्ठ अभिनेत्री अलका कुबलसह शशांक शेंडे यांनी शिवालीच्या कामाचं भरभरून कौतुक केलं.
अभिनेत्री अलका कुबल म्हणाल्या, “आमच्या शिवालीचं मनापासून कौतुक करावंस वाटतं. बऱ्याच नायिका मी किती सुंदर दिसते, मी मेकअपमध्ये किती छान दिसते, हे बघत असतात. अशावेळी शिवालीचा चित्रपटामध्ये ९० टक्के असा मेकअप होता. त्या मुलीने तो केला आणि ती १२-१२ तास मेकअपमध्ये असायची. त्यामुळे मी शिवालीचं मनापासून अभिनंदन करते.”
हेही वाचा – “आमचा संसार चालत नाही, तो…”, कुशल बद्रिकेची ‘ती’ पोस्ट चर्चेत, म्हणाला…
तसंच अभिनेते शशांक शेंडे म्हणाले की, ज्या वयात नटूथटून कॅमेरासमोर ती दिसते आहे. अशा परिस्थितीत अशा पद्धतीचं शिवधनुष्य उचलून काम करणं हे खरंच कठीण आहे. मला तिचं मनापासून कौतुक आहे.
दरम्यान, शिवाली परबचा कामाबद्दल बोलायचं झालं तर, ती ‘महाराष्ट्राची हास्यजत्रा’ या कार्यक्रमाबरोबर इतर काम लीलया सांभाळत आहे. आता ती मराठी रंगभूमीवर पाऊल ठेवणार आहे. प्रसाद खांडेकर लिखित, दिग्दर्शित ‘थेट तुमच्या घरातून’ या नाटकाच्या माध्यमातून शिवाली नाट्य क्षेत्रात पदार्पण करत आहे. या नाटकात शिवालीसह प्रसाद खांडेकर, ओंकार राऊत, भक्ती देसाई, प्रथमेश शिवलकर आणि नम्रता संभेराव पाहायला मिळणार आहे. २१ डिसेंबरपासून हे नाटक रंगभूमीवर येणार आहे.
