प्राजक्ता माळीचे बॉलीवूड अभिनेत्री आलिया भट्टबाबत वक्तव्य; म्हणाली, “तिने कशालाच हद्दपार…”

मला त्या मुलीचं कौतुक…

मराठी अभिनेत्री प्राजक्ता माळीने नुकतीच ‘सुमन म्युझिक मराठी’ या यूट्यूब चॅनेलला मुलाखत दिली. या मुलाखतीत एक अशी अभिनेत्री जिची स्टाइल तुला खूप आवडते आणि जिच्या वार्डरोबवर तुझी नजर असते. यावर उत्तर देताना अभिनेत्रीने आलिया भट्ट असे म्हटले. पुढे प्राजक्ताने म्हटले, “ती वेगवेगळे जे काही ट्राय करत असते, ते मला आवडतं. तिने कशालाच हद्दपार केलेलं नाही. ती सगळ्याच गोष्टी करत असते. मला त्या मुलीचं कौतुक वाटतं. मुलगी, नवरा, संसार इतकं सगळं असून ती करिअरमध्ये यशाच्या शिखरावर आहे. हे छान आहे, हे जमलं पाहिजे”, असे म्हणत अभिनेत्रीने आलिया भट्टचे कौतुक केले आहे.

अभिनेत्री प्राजक्ता माळी तिच्या चित्रपटांतील भूमिकांसाठी प्रसिद्ध आहे. ‘जुळून येती रेशीमगाठी’ या मालिकेतून अभिनेत्री घराघरांत पोहोचली. त्यानंतर तिने चित्रपटांत काम केले. ‘महाराष्ट्राची हास्यजत्रा’ या विनोदी कार्यक्रमाच्या सूत्रसंचालनाची यशस्वीपणे धुरा सांभाळताना ती दिसते. नुकतीच अभिनेत्रीने निर्माती म्हणूनही काम केले. ‘फुलवंती’ या चित्रपटाची निर्माती म्हणून तिने काम केले. तसेच या चित्रपटात ती प्रमुख भूमिकेतदेखील दिसली. या चित्रपटात अभिनेता गश्मीर महाजनी प्रमुख भूमिकेत होता.

आता प्राजक्ता माळी प्रसाद खांडेकर दिग्दर्शित ‘चिकी चिकी बुबूम बुम’ या चित्रपटातून प्रेक्षकांच्या भेटीला येणार आहे. या चित्रपटात प्राजक्तासह अभिनेता स्वप्नील जोशी, वनिता खरात, रोहित माने, प्रथमेश शिवलकर, प्रार्थना बेहेरे हे कलाकार प्रमुख भूमिकेत दिसणार आहेत.