ज्येष्ठ नागरिकांचा सहानुभूतीने विचार करायला हवा

‘सत्या – सई फिल्म्स’ आणि ‘स्कायिलक एन्टरटेन्मेंट’ प्रस्तुत ‘जुनं फर्निचर’ या चित्रपटाची घोषणा नुकतीच दादरमधील शिवाजी पार्क येथे झालेल्या छोटेखानी कार्यक्रमात करण्यात आली. त्याच वेळी चित्रपटाचा टीझर प्रदर्शित करण्यात आला. ‘जुनं फर्निचर’ या चित्रपटाचा टीझर प्रसिद्ध चित्रपट लेखक, निर्माते सलीम खान यांच्या हस्ते प्रदर्शित करण्यात आला. या वेळी आमदार आशीष शेलार, सदा सरवणकर यांच्यासह चित्रपटाचे दिग्दर्शक- अभिनेते महेश मांजरेकर, अमेय खोपकर आणि कलाकार उपेंद्र लिमये, मेधा मांजरेकर, अनुषा दांडेकर उपस्थित होते. यतिन जाधव निर्मित, महेश वामन मांजरेकर दिग्दर्शित हा चित्रपट २६ एप्रिल रोजी प्रदर्शित होणार असून या चित्रपटाची कथा, पटकथा आणि संवादही महेश मांजरेकर यांचे आहेत. ‘जुनं फर्निचर’ या चित्रपटामध्ये ज्येष्ठ नागरिकांना भेडसावणाऱ्या मुद्दयांवर भाष्य करण्यात येणार आहे.

हेही वाचा >>> मराठी सिनेसृष्टीतील प्रसिद्ध खलनायक राजशेखर ‘या’ अभिनेत्रीला म्हणायचे नाकातला केस, स्वतः किस्सा सांगत म्हणाल्या…

हल्ली अनेक नवनवीन शब्द ट्रेण्डिंगमध्ये आहेत. त्यापैकीच हा ‘ओल्ड फर्निचर’ म्हणजेच ‘जुनं फर्निचर’ हा शब्द. ज्येष्ठ नागरिकांना हल्ली ‘जुनं फर्निचर’ म्हणण्याची पद्धत आहे, परंतु हेच जुनं फर्निचर आजच्या तकलादू फर्निचरपेक्षा किती मजबूत आहे, हे दाखवण्याचा प्रयत्न आम्ही या चित्रपटातून केला आहे. हा चित्रपट पाहून चित्रपटगृहातून बाहेर पडताना ‘जुनं फर्निचर’ म्हणून संबोधलं जाणाऱ्या ज्येष्ठ नागरिकांबद्दलचा लोकांचा दृष्टिकोन नक्की बदलेल, असा विश्वासही महेश मांजरेकर यांनी व्यक्त केला.

‘बीईंग ह्युमन’ची गंमत..

अभिनेता-दिग्दर्शक महेश मांजरेकर यांची हिंदीतील आघाडीच्या कलाकारांपैकी एक असलेल्या अभिनेता सलमान खानशी घट्ट मैत्री आहे. ‘जुनं फर्निचर’च्या टीझर प्रदर्शन सोहळयाला उपस्थित राहिलेल्या सलीम खान यांचं कौतुक करतानाच सलमानच्या ‘बीईंग ह्युमन’ या मोठया ब्रॅण्डचं गुपित सांगितलं. ‘बीईंग ह्युमन’ हा ब्रॅण्ड सलमान चालवतो असं म्हटलं जातं. प्रत्यक्षात हा उपक्रम सलीम खान यांच्या पुढाकाराने सुरू झाला. आजपर्यंत या ‘बीईंग ह्युमन’च्या माध्यमातून त्यांनी लाखो लोकांना केलेली मदत खूप थक्क करणारी आहे, अशा शब्दांत मांजरेकर यांनी सलीम खान यांचे कौतुक केले.