रितेश देशमुख आणि जिनिलीयाचा मराठी चित्रपट ‘वेड’ बॉक्स ऑफिसवर नवनवे विक्रम रचत आहे. चित्रपट प्रदर्शित होऊन १९ दिवस झाले आहे, पण चित्रपटाची जादू प्रेक्षकांवर अजूनही कायम आहे. चित्रपटाने सोमवारपर्यंत तब्बल ४८ कोटी रुपयांची कमाई केली आहे. रितेश आणि जिनिलीया पोस्ट शेअर करत चित्रपटाला दिलेल्या प्रेमाबद्दल आभार मानत आहेत.
जिनिलीया मंगळवारी उशीरा एक पोस्ट इन्स्टाग्रामवर शेअर केली आहे. यामध्ये वेड चित्रपटातील एक पोस्टर आहे आणि त्यावर बॉक्स ऑफिसची आकडेवारी दिली आहे. १८ व्या दिवशी म्हणजेच सोमवारी चित्रपटाने १.४ कोटी रुपयांची कमाई केली. चित्रपटाने पहिल्या आठवड्यात २०.१८ कोटी रुपयांची कमाई केली आणि दुसऱ्या आठवड्यात २०.६७ कोटी रुपयांची कमाई केली आहे. चित्रपटाने एकूण ४८.७० कोटी रुपयांचा गल्ला जमवला आहे. “तुम्ही भरभरून दिलेल्या प्रेमाबद्दल धन्यवाद” असं कॅप्शन देत जिनिलीयाने पोस्ट शेअर केली आहे.
कोट्यवधी रुपयांच्या कमाईनंतर ‘वेड’चा दुसरा भाग येणार? रितेश देशमुख म्हणाला, “चित्रपटाचा…”
दरम्यान, रितेश-जिनिलीयाच्या मुख्य भूमिका असलेला ‘वेड’ चित्रपट ३० डिसेंबर रोजी चित्रपटगृहांमध्ये प्रदर्शित झाला होता. हा चित्रपट प्रेक्षकांना वेड लावण्यात यशस्वी ठरला आहे आणि सातत्याने बॉक्स ऑफिसवर कमाईचे नवनवे विक्रम रचत आहे. चित्रपटातील वेड लावलंय गाण्याचीही अनेकांना भुरळ पडली आहे. हे गाणं ट्रेंड करतंय. सध्याची आकडेवारी पाहता चित्रपट लवकरच ५० कोटींचा आकडा गाठेल, असं दिसतंय.
एकाच दिवशी सर्वाधिक कमाई करणारा मराठी चित्रपट हा ‘सैराट’च्या नावे असलेला विक्रम ‘वेड’ने मोडला. तर रितेश देशमुखचा सर्वाधिक कमाई करणारा मराठी चित्रपट हा ‘लय भारी’चा रेकॉर्डही ‘वेड’ने मोडला. आता या चित्रपटाने सर्वात जास्त कमाई करणाऱ्या मराठी चित्रपटांच्या यादीत दुसरे स्थान पटकावले आहे.
