निर्माता, दिग्दर्शक मधुर भांडारकरच्या ‘सर्किट’ या चित्रपटाची चांगलीच चर्चा होताना दिसत आहे. चित्रपटाचा टीजर प्रदर्शित झाला आहे. अल्पावधीत या टीजरला लाखो व्ह्यूज मिळाले आहेत. या चित्रपटातील भूमिकेसाठी अभिनेता वैभव तत्त्ववादीनं आपल्या बॉडीबिल्डिंगवर मेहनत घेतल्याचं दिसून येत आहे. ‘सर्किट’ हा चित्रपट ७ एप्रिलला प्रदर्शित होणार आहे.
वडिलांनी लहानपणी लैंगिक शोषण केल्याचा खुलासा करणाऱ्या खुशबू सुंदर कोण आहेत?
अनेक वर्षे निर्मिती आणि प्रस्तुती केलेल्या आकाश पेंढारकरने या चित्रपटाच्या निमित्ताने दिग्दर्शकीय पदार्पण केलं आहे. वैभव तत्त्ववादी आणि हृता दुर्गुळे ही फ्रेश जोडी या चित्रपटात आहे. चित्रपटातील सिद्धार्थ मोहिते या भूमिकेसाठी वैभवनं विशेष मेहनत घेतली आहे. वैभवनं या भूमिकेसाठी बॉडीबिल्डिंग केलं आहे. त्यासाठी त्याला प्रसाद शिर्के यांचं मार्गदर्शन मिळालं आहे. प्रसाद यांनी आजवर बॉलीवूडमधील सुप्रसिद्ध अभिनेता हृतिक रोशन, टायगर श्रॉफ, उर्वशी रौतेला यांना बॉडीबिल्डिंग ट्रेनर म्हणून फिटनेसचे धडे दिले आहेत.
“तुम्ही सनी देओलसारखे दिसता” अहमदनगरच्या शेतकऱ्याने अभिनेत्याला ओळखलंच नाही, व्हिडीओ व्हायरल
वैभवनं त्याचा लुक इन्स्टाग्रामवर शेअर केला आहे. वैभवच्या बॉडीबिल्डिंगचं आणि लुकचं कौतुक सर्वत्र होत आहे. वैभवच्या ‘सर्किट’मध्ये नेमकं काय पाहायला मिळणार याची उत्सुकता निर्माण झाली आहे. “भेटा सिद्धार्थ मोहिते यांना. एक पात्र जे त्याच्या अद्भुत क्षमतेमुळे नेहमीच माझ्या हृदयाच्या जवळ राहील,” असं कॅप्शन देत वैभवने हा फोटो शेअर केला आहे.
भांडारकर एंटरटेनमेंट आणि पराग मेहता प्रस्तुत या चित्रपटाची निर्मिती मधुर भांडारकर, फिनिक्स प्रॉडक्शनच्या पराग मेहता, अमित डोगरा आणि देवी सातेरी प्रॉडक्शनच्या प्रभाकर परब यांनी केली असून स्वरूप स्टुडिओचे सचिन नारकर, विकास पवार हे सहनिर्माते आहेत.
