राष्ट्रीय पुरस्कार विजेते भाऊराव नानासाहेब कऱ्हाडे यांना ग्रामीण, वास्तविक जीवनातील समस्येवर चित्रपटाच्या माध्यमातून भाष्य करणारे दिग्दर्शक म्हणून सिनेसृष्टीत ओळखले जाते. ‘ख्वाडा’ या पहिल्याच चित्रपटातून त्यांनी चित्रपटप्रेमींचे लक्ष वेधून घेतले होते. त्यानंतर त्यांचा बबन हा चित्रपटही सुपरहिट ठरला होता. यानंतर आता भाऊराव एका वेगळ्या धाटणीचा चित्रपट घेऊन प्रेक्षकांच्या भेटीला येत आहेत. ‘टीडीएम’ असे या चित्रपटाचे नाव असून नुकतंच या चित्रपटाचे पोस्टर प्रदर्शित झाले आहे. हा चित्रपट कॉमेडी जॉनर प्रकारातील असणार आहे.
‘टीडीएम’ या चित्रपटाच्या पोस्टरमध्ये एका पाठमोरा व्यक्ती पाहायला मिळत आहे. या चित्रपटाचे पोस्टर पाहून हा पाठमोरा व्यक्ती नेमका कोण? असा प्रश्न सर्वांनाच पडला आहे. त्यासोबतच या पोस्टरवर गावाकडील रम्य सकाळ पाहता येत आहे. या चित्रपटाचे कथानक नेमके काय असेल, याची उत्सुकता सर्वांनाच लागली आहे.
‘चित्राक्ष फिल्म्स’ आणि स्माईल स्टोन स्टुडिओ’ प्रस्तुत ‘टीडीएम’ या कॉमेडी जॉनरच्या चित्रपटाच्या निर्मितीची धुराही स्वतः भाऊराव नानासाहेब कऱ्हाडे सांभाळत आहेत. या चित्रपटाची कथा, संवाद, स्क्रीनप्लेची जबाबदारी बी. देवकाते आणि भाऊरावांनी सांभाळली आहे. या चित्रपटाच्या संगीताची बाजू वैभव शिरोळे आणि ओमकार स्वरूप बागडे यांना देण्यात आली आहे.
‘ख्वाडा’ फेम भाऊराव कऱ्हाडे घेऊन येत आहेत ‘हैद्राबाद कस्टडी’
“एका वेगळ्या धाटणीच्या चित्रपटातून मी प्रेक्षकांसमोर येणार आहे. निर्मिती आणि दिग्दर्शन दोन्हीची धुरा मी या कॉमेडी जॉनरच्या ‘टीडीएम’ चित्रपटात दिसणार आहे. हा वेगळाच जॉनर पहिल्यांदा करत असल्याने मी ही या चित्रपटाला घेऊन खूप उत्सुक आहे”, असे भाऊराव कऱ्हाडे यांनी या चित्रपटाबद्दल बोलताना सांगितले.
‘ख्वाडा’, ‘बबन’ नंतर भाऊरावांचा ‘हैद्राबाद कस्टडी’ लवकरच प्रेक्षकांच्या भेटीला
‘टीडीएम’ या नावातच वेगळं काहीतरी असणाऱ्या आणि हास्याची मेजवानी घेऊन येणाऱ्या या चित्रपटाची रंगत भाऊरावांनी कुठवर नेऊन ठेवलीय हे पाहणे औत्स्युक्याचे ठरणार आहे. विशेष म्हणजे या आगळ्यावेगळ्या कथेला आणि वेगळ्या धाटणीच्या चित्रपटाला भाऊराव प्रेक्षकांसमोर कसे मांडणार हे पाहणे रंजक ठरणार आहे. त्यामुळे त्यांचा हा ‘टीडीएम’ हा आगामी कॉमेडी जॉनरचा सिनेमा रसिकांसाठी कुतूहलाचा विषय ठरत आहे. तसेच पोस्टरवरील पाठमोरा कलाकार नेमका कोण आहे, याने तर प्रेक्षकांना चांगलीच भुरळ पाडली आहे.
