ओटीटी विश्वात शाहिद कपूरच्या ‘फर्जी’ने रचला इतिहास; लोकप्रिय वेबसीरिजना मागे टाकत मोडला ‘हा’ रेकॉर्ड

शिवाय या सीरिजचे निर्माते राज आणि डीके यांच्या ‘द फॅमिलीमॅन’ या वेबसीरिजशी याचं कनेक्शन जोडल्याने चाहते याच्या पुढच्या सीझनसाठी आणखीनच उत्सुक आहेत. ‘फर्जी’च्या पहिल्या सीझनला प्रेक्षकांनी अक्षरशः डोक्यावर घेतलं आहे. इतकंच नव्हे तर ओटीटी विश्वात एक वेगळाच विक्रम या वेबसीरिजने रचला आहे.

आणखी वाचा : वादाच्या भोवऱ्यात अडकलेला ‘भीड’ बॉक्स ऑफिसवर ठरला अयशस्वी; दुसऱ्या दिवशी केली एवढी कमाई

यातील मुख्य अभिनेता शाहिद कपूरने नुकतंच त्याच्या सोशल मिडिया अकाऊंटच्या माध्यमातून याविषयी माहिती दिली आहे. ही खुशखबर म्हणजे ‘फर्जी’ ही भारतात सर्वात जास्त पहिली गेलेली वेबसीरिज ठरली आहे. याच बातमीचा स्क्रीनशॉट शाहिद कपूरने शेअर करत त्याच्या चाहत्यांचे आभार मानले आहेत. ‘ऑर्मैक्स इंडिया’च्या या रोपोर्टनुसार या वेबसीरिजने इतरही काही लोकप्रिय वेबसीरिजना मागे टाकलं आहे.

शाहिदची ही वेबसीरिज सर्वाधिक पहिली जाणारी ठरली असून, ‘मिर्झापूर’ आणि ‘द फॅमिली मॅन’सारख्या लोकप्रिय वेबसीरिजना ‘फर्जी’ने मागे टाकलं आहे. या वेबसीरिजमध्ये शाहिद कपूर, केके मेनन, विजय सेतुपती, राशी खन्ना, अमोल पालेकर या कलाकारांच्या महत्त्वाच्या भूमिका आहेत. आता याच्या पुढच्या सीझनची सगळेच आतुरतेने वाट बघत आहेत. शाहिद कपूरने याबद्दल मध्यंतरी भाष्य केलं, याचा दूसरा सीझन यायला बराच वेळ आहे पण पुढील सीझन येणार हे नक्की असल्याचं शाहिदने स्पष्ट केलं आहे.