“माझं घर विकायचं…”, सोहेल खानला राजेश खन्ना यांचे खरेदी करायचे होते घर; सलमान खानने दिलेली ‘ही’ ऑफर, म्हणालेला…

राजेश खन्ना यांनी प्रसिद्धीबरोबरच भरपूर संपत्तीही मिळवली. दुर्दैवाने, ते जितके वर आले त्यापेक्षा जास्त वेगाने ते खाली पडले. एक वेळ अशी आली की त्यांच्यावर कर्जाचे ओझे होते.

आयुष्याच्या शिखरावर असताना मित्रांना महागड्या भेटवस्तू देणारे राजेश खन्ना शेवटच्या काही वर्षांत आर्थिक संकटाशी झुंजत होते. अफवा पसरल्या होत्या की त्यांना कार्टर रोडवरील आशीर्वाद येथील त्यांचा बंगला विकायचा आहे, पण जेव्हा सोहेल खानने बंगला खरेदी करण्याची इच्छा व्यक्त केली, तेव्हा काकांनी त्यांच्या मॅसेंजर म्हणून आलेल्या स्क्रीनराइटर रूमी जाफरी यांना काय उत्तर दिले? चला जाणून घेऊया.

राजेश खन्ना यांच्या आर्थिक परिस्थितीबद्दलच्या अफवा आणि अटकळ पसरू लागल्यावर अभिनेता ‘आशीर्वाद’ विकण्याची शक्यता असल्याच्या चर्चाही सुरू झाल्या. त्यांना सलमान खानचा धाकटा भाऊ सोहेलने खरेदी करण्याची ऑफर दिली होती. राजेश खन्ना यांचे चरित्र ‘डार्क स्टार: द लोनलेनेस ऑफ बीइंग राजेश खन्ना’मध्ये एका ठिकाणी त्यांच्या आर्थिक परिस्थितीचा उल्लेख आहे. पुस्तकात असे लिहिले आहे की, त्यांची आर्थिक परिस्थिती दिवसेंदिवस बिकट होत चालली होती, त्यानंतर अशी चर्चा होती की ते त्यांचे आशीर्वाद घर विकण्यास तयार आहेत.

या अफवांचे खरेपण कोणालाही माहीत नव्हते, पण राजेश खन्ना काळजीत दिसत असल्याने लोक त्यावर विश्वास ठेवत होते. आयकर विभागाने सुमारे १.५ कोटी रुपयांची नोटीस बजावल्याची बातमी आली, ज्यामुळे लोक अफवांना खरे मानू लागले होते.

सलमान खानने दिली होती ‘ही’ ऑफर

स्क्रीनराइटर रूमी जाफरी यांना लक्षात आहे की, सलमान खानने त्यांना फोन करून सांगितले की त्यांचा भाऊ सोहेल खान आशीर्वाद खरेदी करण्यास इच्छुक आहे. सोहेलने त्यांना आश्वासन दिले की ते राजेश खन्ना यांनी सांगितलेली कोणतीही किंमतच देतील असे नाही तर आयकराची थकबाकीही भरतील. इतकेच नाही तर सलमान खानने राजेश खन्ना यांच्या प्रॉडक्शन हाऊसच्या चित्रपटात मोफत काम करण्याची ऑफरही दिली. खान कुटुंबाला करार पूर्ण करण्यासाठी रूमी जाफरी यांची मदत हवी होती.

रुमी जाफरी आपला उत्साह लपवू शकले नाही, जेव्हा त्यांनी राजेश खन्ना यांना खान कुटुंबाच्या ऑफरबद्दल सांगितले. तेव्हा ते खूप शांत झाले, ज्यावरून त्यांचे दुःख दिसून आले. जेव्हा राजेश खन्ना यांनी तोंड उघडले, तेव्हा त्यांनी रूमी जाफरी यांना विचारले की ते त्यांना असा सल्ला कसा देऊ शकतात? काकांनी रूमीवर फसवणूक केल्याचा आरोप केला.

रूमी म्हणाले, ‘काकाजी म्हणाले- मी तुला माझ्या जावयासारखे वागवतो आणि तुला माझं घर विकायचं आहे, मला रस्त्यावर आणायचे आहे का? मला हे समजणे कठीण होते की मी फक्त एक पोस्टमन होतो, जो सोहेल खानचा संदेश पोहोचवत होतो.”

राजेश खन्ना म्हणाले होते की, ते एके दिवशी मरतील, पण आशीर्वाद नेहमीच राहील आणि लोक त्यांना कधीही विसरणार नाहीत. ते शेवटच्या श्वासापर्यंत या घरात राहिले. ते नेहमी म्हणायचे, ‘राजा हा राजाच असतो, मग तो सिंहासनावर बसो किंवा नसो; त्यांनी आशीर्वादला आपला वारसा मानले होते.’

आशीर्वाद या बंगल्यामध्ये सुरुवातीला पारशी आणि अँग्लो-इंडियन कुटुंबे राहत होती. राजेंद्र कुमार यांनी तो विकत घेतला आणि त्यांच्या मुलीच्या नावावरून त्याचे नाव ‘डिंपल’ ठेवले. या घरात राहिल्यानंतर राजेंद्र कुमार यांची कारकीर्द वाढली आणि त्यांना ‘जुबली कुमार’ म्हणून ओळखले जाऊ लागले. पण, लवकरच त्यांना अनेक फ्लॉप चित्रपटांना सामोरे जावे लागले.

राजेंद्र कुमार यांच्याकडून हे घर राजेश खन्ना यांच्याकडे गेले, त्यांनी ते ३.५ लाख रुपयांना विकत घेतले आणि त्याचे नाव ‘आशीर्वाद’ ठेवले. राजेश खन्ना यांचेही नशीब राजेंद्र कुमार यांच्यासारखेच होते. मोठ्या नुकसानानंतरही राजेश खन्ना यांनी ते विकले नाही आणि शेवटच्या श्वासापर्यंत तिथेच राहिले.