scorecardresearch

“हिंदी चित्रपट साऊथमध्ये डब करा अन्…” प्रसिद्ध दिग्दर्शकाने अक्षय-अजयला दिलं आव्हान

हिंदी भाषेच्या वादावरून सुप्रसिद्ध दिग्दर्शक राम गोपाल वर्माने बॉलिवूडकरांनाच सुनावले होते. आता त्याने एक नवं ट्विट करत बॉलिवूडच्या काही कलाकारांना आव्हान दिलं आहे.

ajay-akshay-pic
हिंदी भाषेच्या वादावरून सुप्रसिद्ध दिग्दर्शक राम गोपाल वर्माने बॉलिवूडकरांनाच सुनावले होते. आता त्याने एक नवं ट्विट करत बॉलिवूडच्या काही कलाकारांना आव्हान दिलं आहे.

“हिंदी ही आता राष्ट्रभाषा राहिलेली नाही” असं वक्तव्य दाक्षिणात्य अभिनेता किच्चा सुदीप याने काही दिवसांपूर्वी केलं होतं. हा वाद इतका पेटला की कलाविश्वातील मंडळींनी यावर व्यक्त होण्यास सुरुवात केली. अजय देवगणने तर यावर आपलं ठाम मत मांडलं होतं. “हिंदी ही आपली राष्ट्रभाषा आणि मातृभाषा होती, आहे आणि कायम राहिल.” असं अजयनं स्पष्टपणे सांगितलं होतं. अजयच्या वक्तव्यनंतर किच्चा सुदीपने “माझं म्हणणं तुम्ही वेगळ्या पद्धतीने घेतलं, कोणाच्या भावना दुखावण्याचा माझा हेतू नव्हता.” अशा आशयाचं एक ट्विट केलं. पण हा वाद वाढतच गेला.

हिंदी भाषेवरून वातावरण तापलं असताना दिग्दर्शक राम गोपाल वर्माने या वादामध्ये उडी घेतली आणि ट्विट करत बॉलिवूडकरांना सुनावलं. आता पुन्हा एकदा राम गोपाल वर्माने एक ट्विट करत हा मुद्दा वर काढण्याचा प्रयत्न केला आहे. त्याने अजय देवगण, अक्षय कुमारसह इतर अभिनेत्यांना एक आव्हान दिलं आहे.

राम गोपाल वर्मा काय म्हणाला?
“मी अजय देवगण, अक्षय कुमार, रणबीर कपूर, रणवीर सिंग, जॉन अब्राहम यांना आव्हान देतो की, यांनी त्यांचे हिंदी चित्रपट तेलुगू, कन्नड भाषेमध्ये डब करावेत. हिंदी चित्रपट तेलुगू, कन्नड भाषेमध्ये डब करून प्रभास, राम चरण, अल्लु अर्जून, यश या कलाकारांपेक्षा अधिक कमाई त्यांनी दाक्षिणात्य चित्रपटसृष्टीमध्ये करून दाखवावी.” अशाप्रकारचं ट्विट राम गोपाल वर्माने केलं आहे.

पुढे तो म्हणाला, “प्रभास, यश, अल्लु अर्जून, राम चरण या कलाकारांनी बॉलिवूडमध्ये आपलं नाव कमावलं आणि हिंदी कलाकारांना मागे सारलं. ज्या हिंदी कलाकारांना यांनी मागे टाकलं यामध्ये अजय देवगण, अक्षय कुमार, रणबीर कपूर, रणवीर सिंग, जॉन अब्राहमचा समावेश आहे.”

आणखी वाचा – आलिया-रणबीरच्या शेजारीच अथिया बॉयफ्रेंडसह राहायला जाणार, खरेदी केलं महागडं घर?

राम गोपाल वर्माने स्वतः अजयबरोबर ‘भूत’, ‘कंपनी’सारखे चित्रपट केले आहेत. पण अजयवरच त्याने निशाणा साधला आहे. विशेष म्हणजे सलमान खान, आमिर खान, शाहरुख खान यांचा समावेश त्याने या ट्विटमध्ये केला नाही. ‘पुष्पा’, ‘आरआरआर’, ‘केजीएफ२’ या चित्रपटांनी हिंदी बॉक्स ऑफिसवर बराच धुमाकूळ घातला. यामध्ये बॉलिवूड चित्रपट चांगलेच आपटले.

मराठीतील सर्व मनोरंजन ( Manoranjan ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Ram gopal varma says ajay devgan akshay kumar should dub their films in telugu kannad and challenge south actors kmd