83 : There, There and There…! कपिल देव आणि बलविंदर सिंग यांच्यातील मजेशीर किस्सा पाहिलात का?

’83’ हा चित्रपट वर्ल्ड कप सामना त्यातील विजयगाथेवर आधारित आहे. सध्या या चित्रपटातील निर्माते याा चित्रपटाच्या पडद्यामागील काही किस्से शेअर करत असल्याचे दिसत आहे. नुकतंच त्यांचा एक नवा व्हिडीओ समोर आला आहे. यात माजी गोलंदाज बलविंदर सिंग संधू हे मैदानावर घडलेली एक मजेशीर घटना सांगताना दिसत आहे. हा किस्सा चित्रपटातही दाखवण्यात आला आहे.

रणवीरने शेअर केलेल्या या व्हिडीओत बलविंदर म्हणतात की, सामन्यादरम्यान कपिल माझ्याजवळ आला आणि इंग्रजीत बोलू लागला. कपिल म्हणाला, “सरदार बॉल टाईट, बाऊंड्री जाऊ देऊ नकोस. मी फिल्डींग लावली आहे, There, There & There.” यावर मी त्याला विचारले, ‘Where?’ यापुढे ते म्हणाले, “कपिलने त्याच्या डोक्यात फिल्डींग लावली होती आणि डोक्यात फिल्ड कुठे लावतात हे मला माहिती नव्हते. खेळाडू कुठे कुठे आहेत याची मला कोणतीही कल्पना नव्हती.” यावेळी कपिल म्हणला, ‘तुला गंमत सुचतेय. सरदार फायनल मॅच आहे. सिरियस हो.’ त्यावर ‘मी सिरियसच आहे,’ असे त्याला सांगितले.

सध्या हा संपूर्ण व्हिडीओ चांगलाच व्हायरल होत आहे. रणवीर सिंगने शेअर केलेल्या या व्हिडीओला प्रचंड लाईक्स आणि कमेंट्स पाहायला मिळत आहे. या व्हिडीओतून रणवीर हा पडद्यामागचे काही किस्से सांगत असल्याचे दिसत आहे.

’83’ हा चित्रपट २४ डिसेंबर रोजी चित्रपटगृहांमध्ये प्रदर्शित होणार आहे. या पूर्वी हा चित्रपट ४ जून २०२१ रोजी चित्रपटगृहांमध्ये प्रदर्शित होणार होता. रणवीरने सोशल मीडियावर पोस्ट शेअर करत याबाबत माहिती दिली होती. मात्र करोना व्हायरसमुळे उद्भवलेल्या परिस्थितीमुळे चित्रपटाच्या प्रदर्शनाची तारीख पुढे ढकलण्यात आली.

’83’ या चित्रपटाच्या दिग्दर्शनाची धुरा चित्रपट दिग्दर्शक कबीर खान सांभाळली आहे. चित्रपटाच्या टीममध्ये रणवीर सिंग, एमी विर्क, चिराग पाटील ,साकीब सलीम ,ताहिर भसीन ,जतिन सरना ,जीवा, आदिनाथ कोठारे, साहिल खट्टर,पंकज त्रिपाठी हे कलाकार मुख्य भूमिकेत झळकणार आहेत. तसेच अभिनेत्री दीपिका पादुकोण कपिल देव यांच्या पत्नी रोमी यांच्या भूमिकेत दिसणार आहे. आता चाहते चित्रपटाच्या प्रदर्शनाची आतुरतेने वाट पाहात आहेत.