‘शूटआऊट अ‍ॅट वडाला’ची मदार सनी लिऑनवर?

‘शूटआऊट अ‍ॅट लोखंडवाला’मध्ये गँगस्टर माया डोळसची कथा दाखवून झाली. आता ‘शूटआऊट अ‍ॅट वडाला’मध्ये मुंबईचा दादा कोण? मन्या सुर्वे म्हणत नवी गोष्ट दाखवली जाणार आहे. त्यातही गोष्ट मन्या सुर्वेची असली तरी ती त्याच्या साम्राज्यापुरती मर्यादित नाही. त्यात पठाण गँग, दाऊदचा उदय ते दुबईपर्यंतचा त्याचा प्रवास असे बरेच काहीतरी दाखवायचा प्रयत्न दिग्दर्शक संजय गुप्ताने केला आहे. एवढी मोठी गोष्ट सांगायची म्हणून त्यात कलाकारही तेवढेच मोठे पाहिजेत ना! म्हणून जॉन अब्राहम, अनिल कपूर, तुषार कपूर, मनोज वाजपेयी, सोनू सूद असे कितीतरी कलाकार यात आहेत. शिवाय, तीन-तीन आयटम साँग्स आहेत. आणि एवढे सगळे असूनही चित्रपट चालवायचा कोणाच्या जीवावर तर त्या बिचाऱ्या सनी लिऑनच्या जीवावर..
‘शूट आऊट अ‍ॅट वडाला’ शुक्रवारपासून सगळीकडे प्रदर्शित झाला. या चित्रपटाच्या प्रसिध्दीसाठी निवडक शहरातील निवडक थिएटर्सच्या बाहेर मोठमोठे पोस्टर्स आणि कटआऊट्स लागले आहेत. पण, या पोस्टरमध्ये ठसठशीतपणे कोण दिसत असेल तर ती सनी लिऑन. सनीने या चित्रपटात ‘लैला’ नावाचे आयटम साँग केले आहे. या लैलाच्या वेषातील सनीचे भलेमोठे कट आऊट्स थिएटरबाहेर लावण्यात आले आहेत. एवढी प्रसिध्दी सनीला तिच्या देशातही कधी मिळाली नसती. म्हणूनच तर बॉलिवूडने मला आदर दिला, पैसे मिळवून दिले आणि चांगले नावही कमावून दिले, असे कौतुक करत तिने इथेच आपला संसार थाटला आहे. या कौतुकाने सनीचे भले झालेही असेल पण, प्रेक्षकांनी नक्की काय पहायला जायचे?, याबद्दल दिग्दर्शकाचा किंचितसा घोळ झालेला दिसतो.
नाही म्हटले तरी ‘शूटआऊट अ‍ॅड वडाला’मध्ये एवढय़ा कलाकारांची फौज जमवण्यासाठी संजय गुप्ताने चांगलेच पैसे खर्च केले आहेत. शिवाय, चित्रपटात एक प्रियांका चोप्राचे, एक सोफी चौधरीचे आणि एक सनी लिऑनचे अशी तीन आयटम साँग्ज आहेत. मात्र, गँगस्टरची कथा-नावाजलेले कलाकार- पाहुणी..पाहुणी म्हणत प्रियांकाकडून करवून घेतलेले आयटम साँग या सगळ्यात भारी ठरली सनी लिऑन. तिचेच भलेमोठे कटआऊट्स लावून लोकांना थिएटपर्यंत आणायचे होते तर एवढय़ा कलाकारांची भट्टी जमवायची कशाला आणि आम्ही मुंबईत एकेकाळी गँगवॉर कसे वाढले हे दाखवणार अशा मोठमोठय़ा पोकळ गप्पा मारायच्या तरी कशाला..सनी लिऑनचे अशाप्रकारचे दर्शन गुप्ताच्या चित्रपटाला फळणार की नाही ते लवकरच कळेल. सनीला मात्र एकता कपूरच्या जोडीने मुंबईच्या सिध्दिविनायकाला केलेला मनोभावे नमस्कार फळला आहे एवढे नक्की!