अलीकडच्या काळात बहुतांश मराठी कलाकार हे सोशल मीडियावर सक्रिय आहेत. इन्स्टाग्राम, फेसबुकच्या माध्यमातून ते चाहत्यांच्या संपर्कात राहतात. कलाकारांना वैयक्तिक आयुष्यात येणारे चांगले-वाईट अनुभव ते चाहत्यांबरोबर शेअर करत असतात. सध्या ‘वादळवाट’ मालिकेतून घराघरांत लोकप्रिय झालेल्या अभिनेत्री अदिती सारंगधरने शेअर केलेला एक व्हिडीओ सोशल मीडियावर चर्चेत आला आहे. खासगी गाडीतून प्रवास करताना तिला अत्यंत वाईट अनुभव आल्याचं तिने या व्हिडीओमध्ये सांगितलं आहे.
अदिती वैयक्तिक कामानिमित्त पुण्यात एका खासगी वाहनचालकाबरोबर प्रवास करत होती. यादरम्यान संबंधित चालकाला “एसी चालू करणार आहेस की नाही? आम्हाला खूप गरम होतंय.” असं अभिनेत्री सांगत असल्याचं या व्हिडीओमध्ये पाहायला मिळत आहे. यानंतर काचा बंद केल्यावरच एसी लावेन असं उत्तर चालक अभिनेत्रीला देतो. पण, वाढत्या उकाड्यामुळे “एसी फास्ट कर म्हणजेच २ वर चालवं” असं अदिती त्याला सांगते. काही केल्या चालक एसी वाढवण्यास नकार देतो म्हणून अभिनेत्री त्याला गाडी पोलीस स्टेशनला घेऊन चल असं सांगते.
व्हिडीओच्या शेवटी “तू मला उलट, उद्दाम बोलत आहेस. एसी चालू कर मला गरम होतंय…तुझा एसी पूर्ण चालतोय का?” असा प्रश्न उपस्थित करत अदिती चांगलीच संतापल्याचं पाहायला मिळत आहे. हा व्हिडीओ शेअर करत कॅप्शनमध्ये “अतिशय घृणास्पद व लाजिरवाणा प्रकार या संबंधित चालकाला रिपोर्ट करा” असं अदितीने म्हटलं आहे. याशिवाय चालक संलग्न असलेल्या नामांकित कंपनीला देखील अभिनेत्रीने या व्हिडीओमध्ये टॅग केलं आहे.
दरम्यान, अदितीच्या व्हिडीओवर नेटकऱ्यांनी कमेंट्स करत घडल्या प्रकाराबद्दल संताप व्यक्त करून स्वत:चे अनुभव देखील सांगितले आहेत. अनेकांनी अभिनेत्रीला “या चालकाला खरंच तुम्ही पोलीस स्टेशनला घेऊन जायला पाहिजे होतं” असा सल्ला कमेंट सेक्शनमध्ये दिला आहे.
