“खूप माज चढला आहे…”; ‘अग्निहोत्र’मुळे ‘स्टार प्रवाह’वर प्रेक्षक नाराज, जाणून घ्या नेमकं प्रकरण काय?

‘अग्निहोत्र’ या मालिकेत दिवंगत अभिनेते विक्रम गोखले, दिवंगत अभिनेते विनय आपटे, मोहन आगाशे, सुहास जोशी, मोहन जोशी, शरद पोंक्षे, इला भाटे, शुभांगी गोखले, डॉ. गिरीश ओक, मेघना वैद्य, उदय टिकेकर, लीना भागवत, मुक्ता बर्वे अशा अनेक दिग्गज कलाकारांबरोबरच सिद्धार्थ चांदेकर, मृण्मयी देशपांडे, आस्ताद काळे, स्पृहा जोशी, मृण्मयी गोडबोले हे कलाकार प्रेक्षकांच्या भेटीला आले. या मालिकेच्या माध्यमातून अनेक तरुण कलाकारांनी अभिनय क्षेत्रात पाऊल टाकलं. सर्वांच्याच कामाचं, मालिकेच्या कथेचं, दिग्दर्शनाचं प्रेक्षकांकडून भरभरून कौतुक केलं गेलं. प्रेक्षकांच्या आग्रहाखातर ही मालिका आता यू ट्यूबवर पुनः प्रसारित केली जात आहे. परंतु या मालिकेचे आता दाखवण्यात येणारे भाग पाहून प्रेक्षक नाराजी व्यक्त करत आहेत.

आणखी वाचा : Video: नाचता नाचता स्टेजवरून खाली पडला कुशल बद्रिके, ‘चला हवा येऊ द्या’मधील व्हिडीओ व्हायरल

सध्या या मालिकेचे रोज दोन एपिसोड स्टार प्रवाहच्या यू ट्यूब चॅनलवरून अपलोड केले जात आहेत. सुरुवातीचे काही एपिसोड व्यवस्थित अपलोड केले गेले मात्र नंतर एपिसोड अपलोड करताना एपिसोड क्रमांक टाकला जात नाही, एपिसोड पूर्ण अपलोड केला जात नाही, सीन मध्येच कट केले जातात अशी तक्रार प्रेक्षक करू लागले आहेत.

हेही वाचा : दोन दिवसांत पिंपल घालवायचेत? सुकन्या मोनेंनी सांगितला सोपा घरगुती उपाय, म्हणाल्या…

त्यांनी यू ट्यूबवर अपलोड केलेल्या प्रत्येक एपिसोडच्या कमेंट सेक्शनमध्ये प्रेक्षक रोजच त्यांची तक्रार व्यक्त करत आहेत. अनेक नेटकऱ्यां लिहिलं, “कृपया सगळे एपिसोड अपलोड करा.” तर काही जणांनी लिहिलं, “तुम्ही प्रत्येक एपिसोड कट करत आहात. त्यामुळे लिंक तुटते.” एक नेटकरी नाराजी व्यक्त करत म्हणाला, “आज पासून सिरीयल पाहणं बंद करण्यावाचून पर्याय नाही. अर्धवट भाग अपलोड करून सिरीयल पाहण्याची इच्छा नाहीशी केली स्टार वाल्यांनी.” अशा विविध प्रतिक्रिया देत प्रेक्षक नाराजी व्यक्त करत आहेत.