Bigg Boss Marathi Season 5 : ‘बिग बॉस मराठी’च्या घरात आता ‘फॅमिली वीक’ टास्क सुरू झालेला आहे. ‘कलर्स मराठी’ने अभिजीत सावंतच्या कुटुंबीयांचा व्हिडीओ शेअर करत ही आनंदाची बातमी सर्व प्रेक्षकांना दिली. आता ‘फॅमिली वीक स्पेशल’ या टास्कचा दुसरा प्रोमो प्रेक्षकांच्या भेटीला आला आहे. या भावुक करणाऱ्या प्रोमोमध्ये धनंजयचे आई-बाबा व त्याची पत्नी यांची झलक पाहायला मिळत आहे.
आपल्या वडिलांच्या तोंडून अभिमानाचे शब्द ऐकावे, ‘धनंजयचे वडील’ असं माझ्या वडिलांना ओळखलं जावं अशी डीपीची खूप आधीपासूनची इच्छा होती. अखेर मुलाने मिळवलेलं हे यश पाहण्यासाठी धनंजयचे वडील स्वत: ‘बिग बॉस’च्या घरात येणार आहेत. याचा खास प्रोमो ‘कलर्स मराठी’ वाहिनीने इन्स्टाग्रामवर शेअर केला आहे.
हेही वाचा : Bigg Boss Marathi – अखेर ‘तो’ क्षण आलाच! पत्नी व मुलींना पाहून अभिजीत झाला भावुक, गायकाच्या लेकीची Bigg Boss ला गोड विनंती, म्हणाली…
कुटुंबीयांना पाहून धनंजय झाला भावुक
‘बिग बॉस’ म्हणतात, “या घरातील एका सदस्याचं स्वप्न होतं आपल्या वडिलांनी आपलं कौतुक करावं आणि आज तो दिवस आला आहे…” यानंतर घरात धनंजयच्या वडिलांची एन्ट्री होते. बाबा समोरून येत असल्याचं पाहून धनंजयच्या अश्रूंचा बांध फुटतो. ‘बिग बॉस’ संपूर्ण घर कुटुंबीयांना दाखवताना डीपी आपल्या वडिलांच्या पायाजवळ बसल्याचं पाहायला मिळत आहे. वडील-मुलाचं हे हृदयस्पर्शी नातं बघून नेटकऱ्यांनी या प्रोमोवर कौतुकाचा वर्षाव केला आहे.
धनंजयची आई व पत्नी कल्याणी या दोघींनी देखील ‘बिग बॉस’च्या घरात उपस्थिती लावली होती. दोघींना पाहिल्यावर डीपी खूपच भावुक झाला होता. आई अन् पत्नीला जवळ घेऊन हा कोल्हापूरचा रांगडा गडी प्रचंड रडला. हा भावुक प्रोमो सध्या चांगलाच चर्चेत आला आहे.
वडिलांना मिठी मारून डीपी रडला
धनंजय आणि त्याच्या कुटुंबीयांवर हा प्रोमो पाहून कौतुकाचा वर्षाव करण्यात येत आहे. “वडिलांकडून अभिमानाचे शब्द ऐकताच, DP च्या अश्रूंचा फुटला बांध!” असं कॅप्शने देत वाहिनीने ( Bigg Boss Marathi ) हा प्रोमो शेअर केला आहे. अभिजीत, धनंजय या दोघांव्यतिरिक्त आजच्या भागात घरात आणखी कोणाचं कुटुंब येणार हे पाहण्यासाठी सगळेच उत्सुक आहेत.
