कलर्सची ‘ही’ लोकप्रिय मालिका वर्षभरातच घेणार प्रेक्षकांचा निरोप, कलाकारांच्या पोस्टने वेधलं लक्ष

‘कलर्स मराठी’ वाहिनीवर काही दिवसांआधी ‘अंतरपाट’ आणि ‘अबीर गुलाल’ या दोन मालिकांची घोषणा करण्यात आली. या मालिकांचा पहिला प्रोमो देखील प्रेक्षकांच्या भेटीला आला आहे. परंतु, अद्याप या मालिकांच्या प्रदर्शनाची तारीख आणि वेळ जाहीर करण्यात आलेली नाही. परंतु, या नव्या मालिकांसाठी कलर्सवरील एक जुनी मालिका प्रेक्षकांचा निरोप घेणार आहे. ही मालिका नेमकी कोणती जाणून घेऊयात…

हेही वाचा : मराठी मालिका विश्वातील पहिलावहिला ‘एआय’ प्रयोग

कलर्सवर नव्या दोन मालिकांची घोषणा केल्यामुळे कोणती जुनी मालिका प्रेक्षकांचा निरोप घेणार याबद्दल गेली काही दिवस चर्चा चालू होती. अखेर काही कलाकारांनी शेअर केलेल्या इनस्टाग्राम पोस्टमुळे याबद्दल माहिती समोर आली आहे. ‘काव्यांजली’ मालिकेतील अभिनेत्री कश्मिरा आणि यामधील मुख्य अभिनेता पियुष रानडे यांनी यासंदर्भात इन्स्टाग्राम स्टोरी शेअर केली आहे. पियुषने मेकअपरुममधील एक व्हिडीओ शेअर करत त्यावर “विश्वजीत म्हणून शेवटचे काही दिवस…खूप खूप आभार” असं कॅप्शन दिलं आहे. याशिवाय कश्मिराने सुद्धा “काव्या म्हणून शेवटचे काही दिवस” अशी स्टोरी शेअर केली आहे. त्यामुळे आता वर्षभरातच ‘काव्यांजली- सखी सावली’ मालिका प्रेक्षकांचा निरोप घेणार असल्याचं स्पष्ट झालं आहे.

हेही वाचा : बेपत्ता गुरुचरण सिंगच्या आर्थिक परिस्थितीबद्दल त्याचे वडील म्हणाले, “माझं वय झालं आहे, त्यामुळे…”

‘काव्यांजली’ मालिका गेल्यावर्षी २९ मे २०२३ रोजी सुरू झाली होती. आता वर्षभरातच ही मालिका प्रेक्षकांचा निरोप घेणार आहे. सुरुवातीला या मालिकेला चांगला प्रतिसाद मिळत होता. परंतु, सध्या याचा टीआरपी बराच खाली गेला आहे. कलाकारांनी स्टोरी शेअर केल्या असल्या तरीही वाहिनीकडून अद्याप अधिकृतरित्या याची घोषणा करण्यात आलेली नाही. आता कलर्स मराठीवर सुरू होणाऱ्या ‘अबीर गुलाल’ आणि ‘अंतरपाट’ मालिकांना प्रेक्षक कसा प्रतिसाद देतात हे पाहणं उत्सुकतेचं ठरणार आहे.