‘इश्क का रंग सफेद’ फेम अभिनेत्री स्नेहल रायच्या गाडीचा अपघात झाला आहे. पुण्याच्या दिशेने जात असताना एका भरधाव ट्रकने तिच्या कारला धडक दिली. यामुळे गाडीचे बंपर आणि मडगार्डचं नुकसान झालंय. ड्रायव्हरने प्रसंगावधान राखून गाडी वळवण्याने गाडीतील सर्वांचा जीव वाचला आहे. गाडीतील कोणीही गंभीर जखमी झालं नाही.
स्नेहल रायचा ड्रायव्हर आणि तिला गाडीतून सुखरूप बाहेर काढण्यात आलंय. अपघातानंतर ट्रकचालक पसार झाल्याची माहिती तिने दिली. त्यानंतर तिने तत्काळ जवळच्या पोलीस स्टेशनला फोन केला आणि पोलीस घटनास्थळी पोहोचले, असं तिने ‘ई-टाइम्स’ला सांगितलं.
“अचानक एक ट्रक आला आणि माझ्या कारला धडकला. माझ्या ड्रायव्हरचे आभार की त्याने माझा जीव वाचवला. आम्ही पोलिसांना कॉल केला आणि ते १० मिनिटांत तिथे पोहोचले. बोरघाट पोलीस स्टेशनमधील योगेश भोसले यांनी खूप मदत केली. अपघातानंतर मी खूप घाबरले होते, त्यांनी मला ग्लुकोज दिले आणि आवश्यक ती मदत केली,” असं स्नेहलने सांगितलं.
घटनेनंतर ट्रक ड्रायव्हर पळून गेला होता आणि तिच्याकडे वाहनाची कोणतीही माहिती नसल्याने ती एफआयआर दाखल करू शकली नाही. या घटनेने स्नेहल हादरली असून ती हॉस्पिटलमध्ये गेल्याची माहिती समोर आली आहे.
