‘कौन बनेगा करोडपती’चा पंधरावा सीझन सध्या चांगलाच चर्चेत आहे. बॉलीवूडचे महानायक अमिताभ बच्चन गेल्या २३ वर्षांपासून हा शो होस्ट करत आहेत. काही दिवसांपूर्वी पंजाबचा २१ वर्षीय जसकरण सिंग पंधराव्या पर्वाचा पहिला करोडपती ठरला होता. आता लवकरच आणखी एक स्पर्धक करोडपती होणार आहे. करोडपतीच्या निर्मात्यांनी नुकताच कार्यक्रमाचा नवा प्रोमो प्रदर्शित केला आहे. या प्रोमोमध्ये ७ कोटींच्या शेवटच्या प्रश्नाला एक स्पर्धक खूप भावुक झाल्याचं दाखवण्यात आलं आहे.
सोनी वाहिनीच्या अधिकृत इन्स्टाग्राम पेजवर ‘कौन बनेगा करोडपती’चा नवा प्रोमो नुकताच शेअर करण्यात आला आहे. यामध्ये अमिताभ बच्चन संबंधित स्पर्धकाला ७ कोटी रुपयांचा १६ वा प्रश्न विचारत असल्याचं दाखवण्यात आलं आहे. हा प्रश्न विचारण्यापूर्वी स्पर्धक भावुक झाल्याचं प्रोमोमध्ये पाहायला मिळत आहे. हा स्पर्धक अमिताभ बच्चन यांच्यासमोर हात जोडून, पाया पडून त्यानंतर त्यांना मिठी मारून रडत असल्याचं पाहायला मिळालं.
हेही वाचा : “गणपतीसमोर चपला घालू नकोस…”, ट्रोलरच्या कमेंटला उत्तर देत फराह खान म्हणाली…
“भावना अशाच निर्माण होत नाही, प्रत्येक भावनेमागे एक विशिष्ट कारण असतं…मी तुम्हाला जरुर सांगेन” असं बिग बी या प्रोमोमध्ये बोलताना दिसत आहेत. काही दिवसांपूर्वी जसकरण सिंग या २१ वर्षाच्या मुलाने ७ कोटींच्या प्रश्नापर्यंतचा टप्पा गाठला होता. परंतु, उत्तराची खात्री नसल्याने त्याने खेळ सोडला. जसकरणने तब्बल १ कोटी जिंकत आपलं स्वप्न पूर्ण केलं. तो पंधराव्या पर्वाचा पहिला करोडपती ठरला होता. आता लवकरच या पर्वाला दुसरा करोडपती मिळणार आहे.
दरम्यान, अमिताभ बच्चन गेल्या अनेक वर्षांपासून कौन बनेगा करोडपती हा कार्यक्रम होस्ट करत आहेत. करोडपतीचा हा नवा प्रोमो पाहून नेटकऱ्यांनी या संबंधित स्पर्धकाने ७ कोटी जिंकले असावेत असा अंदाज बांधायला सुरुवात केली आहे. आता खरंच या स्पर्धकाने ७ कोटी जिंकलेत की नाही? हे आपल्याला येत्या काही भागांमध्ये पाहायला मिळणार आहे.
