आहारात साखर नकोच! हास्यजत्रा फेम प्रियदर्शिनी इंदलकर ‘असा’ जपते फिटनेस, दिल्या ‘या’ ५ हेल्थ टिप्स; म्हणाली, “सूर्यनमस्कार…”

प्रियदर्शिनीने नुकतीच सकाळ वृत्तपत्राला मुलाखत दिली. यावेळी तिने स्वत:चा फिटनेस कसा जपला याबाबत खुलासा केला. तसेच चाहत्यांना काही हेल्थ टिप्स सुद्धा दिल्या. अभिनेत्रीने तिच्या आहारातून शुगर पूर्णपणे कट केलेली आहे. म्हणजेच प्रियदर्शिनी साखरेचे पदार्थ खात नाही यासह दुधाचे पदार्थ खाणंही ती टाळते. साखर कमी केल्याने शरीरात मोठा फरक जाणवतो असं तिने नमूद केलं आहे.

सकाळी उठून लगेच चहा पिऊ नका; यामुळे अ‍ॅसिटिडीचा प्रचंड त्रास होतो. एका जागी बसून काम असल्यास दिवसभरात एकदा तरी चालायला जा, अर्धा ते पाऊण तास व्यायाम करा, सोशल मीडियावर दिसणाऱ्या आभासी फिटनेस गोल्सचा पाठलाग करू नका, स्वत:च्या शरीराचं मूल्यमापन करा या पाच हेल्थ टिप्स प्रियदर्शिनीने चाहत्यांना दिल्या आहेत.

प्रियदर्शिनी अनेकदा दिवसातून १०० ते १०७ सूर्यनमस्कार घालते. मात्र, जेव्हा शरीर पूर्ण तयार असतं, पुरेशी झोप झालेली असते फक्त तेव्हाच ती एवढे सूर्यनमस्कार घालते. या फिटनेस जर्नीमध्ये दीक्षित डाएटमुळे फायदा झाल्याचं अभिनेत्रीने सांगितलं आहे. एका सिनेमासाठी अभिनेत्रीला वजन कमी करावं लागणार होतं. यावेळी प्रियदर्शिनी १८ तास फास्टिंग करायची. याचे कालांतराने साइड इफेक्ट्स जाणवले म्हणून अभिनेत्रीने १४ ते १६ तास फास्टिंग करायचं असं नियोजन केलं.

दरम्यान, प्रियदर्शिनी इंदलकरच्या वर्कफ्रंटबद्दल सांगायचं झालं तर नुकतीच ती ‘दशावतार’ सिनेमात झळकली. या चित्रपटाने बॉक्स ऑफिसवर रेकॉर्डब्रेक कमाई केल्याचं पाहायला मिळालं. याशिवाय अभिनेत्री हास्यजत्रेच्या माध्यमातून प्रेक्षकांचं मनोरंजन करताना दिसते. प्रियदर्शिनीने अल्पावधीतच प्रेक्षकांचं मन जिंकून घेतलं आहे.