‘तुला शिकवीन चांगलाच धडा’ ही छोट्या पडद्यावरील लोकप्रिय मालिकांपैकी एक आहे. अल्पावधीतच या मालिकेने प्रेक्षकांची मनं जिंकली. या मालिकेची कथा कलाकारांचा अभिनय आणि या मालिकेत दाखवले जाणारे ट्विस्ट अँड टर्न्स प्रेक्षकांना चांगलेच आवडत आहेत. तर आता अधिपतीवर प्रेक्षक फारच खुश झाले आहेत.
या मालिकेत अक्षरा ही भूमिका शिवानी रांगोळे साकारत आहे तर अधिपतीच्या भूमिकेत ऋषिकेश शेलार दिसत आहे. नुकताच या मालिकेत अक्षरा आणि अधिपती यांचा राजेशाही विवाह सोहळा संपन्न झाला. पण हा विवाह सोहळा झाल्यावर अधिपतीने दाखवलेल्या समजूतदारपणाचं सर्वजण कौतुक करत आहेत.
या मालिकेतील एक व्हिडीओ नुकताच वाहिनीने त्यांच्या सोशल मीडिया अकाउंटवर पोस्ट केला. यामध्ये अक्षरा-अधिपती यांचं लग्न झाल्यावर अक्षराची पाठवणी होताना दिसत आहे. अक्षरा आणि तिचे कुटुंबीय खूप भावूक झालेले दिसत आहेत. तर त्यांच्या डोळ्यात आलेले अश्रू पाहून अधिपतीही भावूक झालेला दिसत आहे. अक्षराच्या वडिलांची समजूत काढताना अधिपती म्हणतो की, “तुमच्या मुलीचं लग्न झालं असलं तरीही आता तुमच्या कुटुंबात एक नवीन सदस्य सामील झाला आहे. जावई कमी आणि मुलगा जास्त.”
हेही वाचा : कविता मेढेकरांनी उघड केलं त्यांचं फिटनेस सिक्रेट, म्हणाल्या, “याचं उत्तर एकच आहे की…”
तर आता या व्हिडिओवर कमेंट करत नेटकरी अधिपतीच्या वागण्याचं कौतुक करत आहेत. एकाने लिहिलं, “अधिपती एक वाक्य खूप छान बोलला, एक मेम्बर अजून ऍड झालाय तुमच्यात, खरेच असा विचार प्रत्येक जावयाने करावा.” तर दुसऱ्याने लिहिलं, “बायकोच्या डोळ्यात अश्रू पाहून रडणारा तू एकमेव मुलगा.” तर तिसरा नेटकरी म्हणाला, “अधिपती तुझ्यासारखा समजूतदार मुलगा, जावई, नवरा, सर्वांना मिळो.” त्यामुळे आता सर्वजण अधिपतीच्या वागण्यावर फारच खुश झाले आहेत.
